الأحد، 23 أغسطس، 2009

إلى بلدية مسقط .. اريد امشي براحتي

قررت اغير عاداتي شوية ، وبدل المشي على الات الجم أمشي في الهواء الطلق . بعد الفطور فكرنا انا وبنت محمد - الله يطول في عمرها ويحفظها يارب - وين نروح نمشي ؟؟ وين وين ؟ استثنيت كل الاماكن ، تحسبا اني اصادف كلاب ، ويامكثر الكلاب السايبه هالايام . قررنا نروح حديقة القرم الطبيعية ، مكان هادي وحلو وامان وبدون كلاب وحيوانات ضارية .
وصلنا الحديقة ، كانت هاديه مافيها ولا عماني ، كم عائلة هندية ، وشخص يركض شكله هندي بعد ، استانست عالمكان عجبني وقررت كل ما اريد امشي اروح هناك . قطعنا نصف المسافه او نصف الدورة حول البحيرة . توقفت فجأه وتجمدت فمكاني ، وبنت محمد ماعندها خبر ، اناديها ولا تسمعني ، شاكة فيها انها حاطه الايبود تحت شيلتها. ما التفتت ولا عبرتني . ركضت وراها وشديت عبايتها ، وقلت :
مسقطيه الهوى : يالله راجعين .
بنت محمد : ايش ؟
مسقطيه الهوى : اقولك يالله راااجعين .
لاحظت بنت محمد انخطاف لوني وزرقه شفايفي ورجفتهم .
وبدون ما اشرح عرفت السبب لما سمعت نباح الكلاب الذي يقترب .
بنت محمد : الحين انتي خيفانه من الكلاب الثلاثة الي واقفين هناك ، واشرت عليهم .
والله كنت شوي وارمي نفسي في البحيرة من الرعب ما توقعت ان الكلاب قريبه لهالدرجة ، اصلا ما كان في حديقة القرم كلاب سايبة ، وانا جايه متعنية عشان امشي بأمان بدون ما احاتي .
ماحسيت بنفسي سبقت الوالدة وقلت لها بنتظرك في السيارة .

الى البلدية :

سالفة الكلاب السايبة بدأت تزيد وتصير ظاهرة مو بس في حديقة القرم ، لكن حتى في حارتنا . وما اعرف احد اشتكى ولا لأ . لكن انا بدور رقم ممكن اشتكي فيه ، واريد حل لو سمحتوا ...
اريد امشي براحتي .