كالعادة ، توأم الروح تسافر وانا اتأزم نفسيا واستوحش واحس اني وحيدة ومكسورة . اليوم قررت اتمرد واطلع مع صديقة الطفولة ( زووز ) قضينا مشاوير مهمة واشترينا هدية لصاحبتنا العزيزة الي عيدميلادها بكرة وإلي توأم الروح ما تعرفها . ( اعرف ان توأم الروح اول ما تقرأ الكلام بترسل مسج من هاذي ومن وين عرفتيها وايش تشتغل وبتحقق فأصلها وفصلها .. ، لكن على مين ، انا ناويه اقهرها وما اقولها اي شي عن صديقتي المشتركة مع زوز)- تستاهل وإذا كنتي تقرأي هالكلام ياتوأم الروح اقولك : ايوا تستاهلي ، كل يوم والثاني راسلتلي وسائط : هذي صورتي على شط اسكندرية ، هذي السينما الي بندخلها بعد شويه ، هذي المكتبة الضخمة) - تخليني اغار خصوصا لما شفت صورة المكتبه،، يالله حسيت بنار (تعرفني كيف اعشق المكتبات وتتناذل ) وبهذي المناسبه بكتب هذا الموضوع عشان اقهر توأم الروح واسرد لها تفاصيل طلعتي مع صديقة الطفولة ( زووز) .
مريت على ( زووز )البيت ومن اول ما دخلت السيارة ما سكتنا ، خصوصا ان ( زووز) مدرسة ّ وقد نفيت كغيرها لمدة عام واخيرا أشفقت وزارة التربية عليها وعّينت في العاصمة مسقط حيث تنتمي وأنتمي . فكانت الحكايا تتقافز شغفا للخروج من دواخلنا . رحنا الستي ورحنا الخوير ورحنا الشاطي ورحنا ورحنا - ويا توأم الروح انبطي غيرة على شط اسكندرية ...
وبعد كل الحواطة ، يالله شوو كنا عطشانييين نتخيل سراب العصاير المثلجة ، والبربيكان البارد الي ينعش صمامات القلب ، ولكي نلبي نداء العطش هذا ، توجهنا إلى (قرمشينو) صح انه هالمحل الخطير بعييد كثير عن بيتنا بس تعنينا له ، بس عشان نزيد من الحواطة ونقهر وتوأم الروح وهي تقرأ هالكلمات .
وصلنا ( قرمشينو) ، ونادينا رفيق ، في رفقاء عدة في هذا المحل وكلهم يتشابهوا اظنهم من عائله وحدة ، بس الرفيق الي جانا نكنيه (برفيق مسطول ) دايما يعذبنا لين ماياخذ طلبيتنا صح . المهم هالمره وعشان ما يلخبط ، قلنا نختصر الطلبيه في مشروبين بس . عشان نروي عطشنا بلي خاطرنا فيه :
( زووز ) : انا في ريد واحد بيبسي دايت .
مسقطيه الهوى : انا في ريد واحد بربيكان رازبيري . رازبيري سيم سيم ستروبيري . في معلوم ؟!!
رفيق مسطول - وهو يهز الراس وأمطر على عبايه زووز بعضا من رذاذ جوز الهند- : ايوا في معلوم .
رجع رفيق بما طلبناه - او هكذا ظننا - وحركنا السياره مودعين( قرمشينو) .
قررنا انا و ( زووز) ان تشرب كل منا ما طلبته في بيتها ، لنضيف الى البارد ثلجا ً يصقعه برودة ً . وصلت (زووز) البيت ، وقفلت انا راجعة ً إلى بيتنا . جلست عالكرسي بعد ما جهزت كوب مليان بالثلج ، وتأملت الكيس امامي برضى . مددت يدي ، لمست تلك الزجاجة الخضراء الرشيقة : اه ياباربيكان مافي زيك اثنان . وانا اصب الباربي لفتت نظري تلك العلامة الصفراء !!! ومثل الي انسطل ما استوعب او اني ما رضيت استوعب ان الباربي كان ما رازبيري الي خاطري فيه ، كان ( أناناس ) .
ذقت الطعم تلون وجهي ، ماحبيته ابدا .
باربي : كأني ما عجبتك ؟!
مسقطيه الهوى : خير !!! انت بعد تتكلم ؟! عشنا وشفنا .شربت كل انواع الباربي الي احبهم ومحد فيهم كلمني ، وانت ( يالشبّهه) \ تعبير عماني للتعبير عن القبح والدمامة \ تتكلم ؟
باربي : وانتي على بالك ، انا مثل غيري من الباربي ، انا اناناس . ايش دراك انتي بالذوق ؟!
مسقطيه الهوى : تراك زودتها .
باربي : انت ماتشوفي ، انا نصي فاكه ، بس نصي الثاني منكم . امم ركزي شويه : انا ... ناس . انا الي غنالي محمد عبدو : مجموعة انسان، هذاك انا . انا ناس، كلي مشاعر واحساس .
مسقطيه الهوى- غفت على الكرسي ، وماحست على نفسها من زود التعب- وهي تهذي : انت كلك مشاعر واحساس .
كان هناك من تسلل الى الغرفة ولم تشعر به حتى صرخت بسبب ألم حاد اصاب اذنها ، نعم كانت بنت محمد تضغط على اذنا بغل ٍ وقسوة وهي تصرخ : من هذا حبيبتي الي كله مشاعر واحساس ؟
مسقطيه الهوى : انااااانااااس والله اناااناس .
بنت محمد - وهي تضغط بشدة على اذني : اناناس ياحبيبه امك انتيه ، انتي فوادك فأناناس ؟.
مسقطيه الهوى تصرخ متألمة من القرص المستمر : والله ما احبه والله مايعجبني .
بنت محمد : ماتحبيه تو عاد ، قبل شويه كله مشاعر واحساس . ها بعدك باغيه اناناس ؟
مسقطيه الهوى : التوووووووووووبة التووووووووووبة ماباغيه شي .
- في النهايه كما ترون قرائي الاعزاء ، فأن القدر لايزال يقف مع توأم الروح رغم محاولاتي لإغاظتها ، دوم تطيح على راسي وتكون النهايه مؤلمة ، واحصل على انتقامها الابدي وان لم تتواجد هي ؟؟ انه القدر وانها لحقيقه مؤلمة ، ولكن هذا هو الواقع وتلك هي القواقع...
تفاصيل الصورة :
التقاط : مسقطيه الهوى .
الاربعاء 19-8-2009
