تجاهل تام لعباس واخوته وللحرية

يتجاهل اعلامنا " المجيد" قافلة الحرية التي يهاجمها الاحتلال الاسرائيلي في الوقت الراهن والتي ضمن ركابها أخونا وولدنا وابن بلدنا ( عباس مصطفى اللواتي ) ، والإعلام العماني كأنه العيد حاليا يعرضوا المسلسل السوري مال رمضان ما اعرف ايش اسمه ( دمعة حزن او ايش ) !!!!!!

تأكدت ان دمكم ( ناصع ) * بالعماني يعني ما عندكم دم ، ما غريبه طبعا لأن كل الابحاث العلمية تقول ان اغلب العمانيين عندهم ضعف في الدم !!!!! من زمان ما من الحين .

في الاحداث السابقة كنا نقول ما تحبوا تتدخلوا في شؤون الغير بطريقة مبالغ فيها تتناولوه بكل حياديه ، بس اليوم العماني على ظهر قافلة الحرية وانتو ولا همكم !!! خلاص تبريتوا منه ، ولا ما يهمكم !!!

نحن ما طالبين تحركات دبلوماسيه معينه رغم ان حقنا نطالب بحماية اخونا عباس لأنه هذي مسؤوليتنا . أضعف الايمان تحطوا شريط اخباري في التلفزيون واعرضوا اي شي ( تفل ) تريدوه . لكن لاشريط اخباري ولا شي ، عباس ولد الجيران ما ولدنا .

اكيد دورنا كمدونين ومنتديات وكأفراد التضامن بكل ما نقدر عشان نوصل صوتنا واهتمامنا بالقضية ، نحط صور عباس في مدوناتنا وفي منتدياتنا وانشالله نتحمدله بالسلامه لما يرجع ونقول له : ما نسيناك وقلوبنا كانت معك .

من الظهر وانا على موقع ( تويتر ) احاول اكتب شعارات التضامن مع ( قافلة الحرية ) وحاليا ( تحرير قافلة الحرية ) في قائمة المواضيع الاكثر تداولا في تويتر ، وهذا بيلفت انظار الناس في كل انحاء العالم للموضوع ، رغم ان 2000 شخص تظاهروا في بريطانيا ، شكلهم مهتمين اكثر بقافلة اغلبها عرب اكثر منا !!!!!!!!!!!!!!!!

عادي وكأنه العيد عندنا

فرحت بالبيان التضامني للجمعية العمانية الكتاب والادباء وجمعية الصحفيين العمانية ، وانشالله كل المجتمع المدني يتضامن مع القضية ، وخلوا ( اعلام الطبول ) يرقص ويهز وحده . والله فيني قهر كأن الاعلام العماني معزول في جزيرة ما عارف ايش صاير في العالم ، بس ما لجرح لميت ايلام ، فالحين بس كل كلمة والثانية ( خفافيش الظلام وخفافيش الظلام ) .

ما اقول غير الله يفرج كرب كل ركاب قافلة الحرية ويرجع عباس لعمان ولأهله بالسلامه ...

وقلوبنا معك يا عباس اذا هم نسوك احنا ما ننساك ....

عن الجمال والحلاوة والتخلف والنزقة

معايير الجمال : غالبا ما تتشكل مقاييس الجمال وفقا للمجتمع وما يملكه من مقومات وكذلك ما يفتقد من مقومات . مثلا : حين يصاب العربي والعماني تحديدا " بالنزقة " حين يرى " وحدة بيضاء ! ويحس ان كل العالم حاسدينه انه مصاحبها .

امس تحديدا رحت السينما ، شفت واحد " شيفة " مصاحب وحده ضخمه وبيضاء . انا ما من النوع الي احب أدقق في الناس ، غالبا اشوف احد من الاهل في مكان عام ولا انتبه . بس هالشاب قصته لازم أحكيها .

وصلنا انا وتوأم الروح قبل عرض الفلم بنص ساعة ، المهم اضطرينا ناخذ البوب كورن ونجلس ننتظر في الكراسي . الاخ " الشيفة " كل شوي يتخرطف قدامنا ويسحب الترسانة البيضا الي معاه. رايح جاي ، اانا صراحة خفت البنت الي معه تعصب وتتأفف وتنفخ ( اوووف ) وتصكه في الجدار. كله كوم ولما يسحبها قدامنا ، يعطينا نظرات ( كيد عذالك ) !!!! هذا الي بيجلطني وتأكدت ان عقدة " النزقة " متأصلة فينا . وكل شوي هي تمد يدها وتعطيه بوب كورن وهو يزيد من نظرات " كيد عذالك " . حسيت اني أتخيل ، ما معقوله حد كذا ينتقز بس عشان مصاحب وحدة بيضا وياريت " جميلة " كنت بعذره ، على الاقل يكون في تبرير " للنقزة " . انا كتمت ملاحظتي في نفسي عشان ما أظلم احد وقلت " يغيب " يتخرطف قدامي لين ما " يعلق " لون اليد البيضا فيه . كان مشهد ذكرني " بالجميلة والوحش " ، خصوصا لما مدت صبوعها بالبوب كورن ، يااالهوي فتح الفك المفترس ، والمصيبه ضروسه متكسرات والى باقي يروج . المهم منظر الله لايبلي فيه احد . من زمان ما شفت مناظر بشعه مثل امس .

المهم انا سكت وفجأة توأم الروح بكل برود الدنيا قالت :

- إلي يقهر انه عايش الدور .

مسقطية الهوى : من هو ؟

توأم الروح : الخسف الي قدامنا ، ما شايفتيه يتخرطف كل شويه ، كـأننا مستعجبين ! تو هو منتزق انه مصاحب وحدة بيضا وضخمه ، نحن ايش ذبنا ؟! يتخرطف قدامنا . ذكرني بقولة جدتي بنت سعيد يوم تقول : غراب فووق ياسمينة .

مسقطية الهوى : هههههه والله جدتك الله يرحمها كانت حركات . تعرفي انا كنت اشوف ناس ترفع راسها وتشحط عمرها لما يمشوا مع اجانب ، بس مثل هذا ما شفت . تتوقعي أيش السبب ؟!

توأم الروح : بديتي مؤتمر القمة ما تصدقي شي يخطف عشان تفتحي لنا جلسات نقاش ، وكيف وليش ومن ؟ لا تحاولي ما بتعب نفسي يوم اني حتناقش عن هالاشكال .

طبعا توأم الروح " خزّتبي " وكنت شوي وأمد لها الشفة السفليه واعطيها وصلة من صياح غادة عبدالعال : عاااااااااااااااااااااااااااااااااااا

بس ربكم ستر ودخلنا الفلم فحصلت شي يلهيني عن الوضوع ، اليوم وانا عالمكتب تذكرت الموقف قلت اذا كانت توأم الروح استخسرت تناقش الموضوع معاي ، فأنا بناقشه وحدي .

أخوتي واخواتي طلبة وطالبات الثانوية العامة ( هتقرأوا هالموشح كثير فلا تستغربوا )

عرفنا في بداية الحلقة معنى ( معايير الجمال ) وقلنا انها غالبا ما تتشكل وفقا للمقومات التي يملكها المجتمع ، ووفقا للمقومات والخصائص التي يفتقدها كذلك ، ولا ننسى التنويه ان معايير الجمال تتغير من زمن لآخر .

اهم مقومات الجمال لدى العماني ( شيئين لا ثالث لهما )

1- البياض .

2- الشعر الناعم .

لاحظوا اني ماذكرت " العيون الملونه " او " الطول " لأسباب في نفس مسقطية ، سأكشف احدها لكم الان .

اما عن " الطول " : فهو صفة يفتقدها العماني بشكل ملحوظ رغم وجود الاستثناءات ، لكن احنا اذا استمرينا في وضع التزاوج ذو النطاق الضيق ، احتمال كبير بعد كم جيل بتضمحلوا و بتخلفوا " اقزام " .

عموما - كل واحد بعقله راضي وانا ادرك ان عشان نكسر حاجز الزواج التقليدي وتتزوج من الخارج يشترطوا عليك تكون عندك اعاقه ولا عاهه ، عشان محد يطمع في المرأة ويستغلها عشان الجنسيه العماني ، كأن الناس " مستذبحة تحصل الرد كارد على وزن الجرين كارد مال امريكا " . يطمعوا بأيش ما اعرف بس جايز هم أدرى .

دعونا يا طلبة العلم نفند معايير الجمال العمانية كل على حدة :

أولا : البياض

طبعا البياض صفة " شاذة " عن لون السحنة العمانية الشائعة ، فحين يشع الابيض سواء في فتاة ام شاب ، ترا " النقزة " وانا لا اقصد البياض العادي ، لا اقصد البياض الأجنبي الي سببه " عقدة الخواجه " . انا ما بتكلم ان الشاب العماني ينتقز لا حتى الشابه العمانية كلاهما في " النقزة " سواء .

ويضحي العمانيون بكافة ملامح الجمال الاخرى من اجل البياض ، فتسمع شابا يصف جميلته بكافة اوصاف المدح والاعجاب ، وانا اضفت الهاء وقلت ( جميلته ) عمدا وما اريد اقول جميلة بالمطلق ، لأن في النهاية " الجمال في عين الرائي "

ولما تلتفت لترى هذه الجميلة تلاقيها " جدارا ابيضا " يعني ممكن يكون مافيها عيون - عادي مايهمه اهم شي بيضا ، طيب ممكن مافيها ولا ضرس - عادي اهم شي بيضا - طيب الحرمه كسيحة ما تمشي - عادي اقولك اهم شي بيييضاااااا

( مما سبق نستطيع القول ان الابيض لون نادر وتميزه في محيطنا يمنحه صفة الامتياز ، وكذا الحال في المجتمعات الاخرى : في الدول الغربية : تلاقي مصممي الازياء يروحوا أدغال افريقا عشان يحصوا بنت طويلة ولونها اقرب للكحلي ويديها طويلة وتوصل لركبها وصلعة ومافيها شعر ! هذي بالنسبه لهم : العارضة الجميلة والمميزة الي تلاقي صورها على أغلفة اشهر المجلات ) .

ثانيا : الشعر الناعم .

بتقولوا ما كل الناس شعرها ( أجعد ) عندنا شعر ناعم في عمان ، يعني ما عندنا عقدة نقص في الشعر الناعم . لا عندنا عقدة نقص .انا ما اقصد النعومة العادية ، انا اقصد النعومة الي ماممكن تلاقيها بسهولة ، نعمومة الشعر " الفلبيني " اسود فاحم وناعم وتحسه مجفف الشعر يمر عليه 24 ساعه . هالنعومة الي أقصدها . مع ان الشعر المموج والغجري في نظري جميل لأني احب الشعر الثائر ، بس الدنيا اذواق .

أتذكر والدتي بنت محمد لما جتنا اول شغاله فلبينيه ، تجننت على شعرها كل ما تمر الشغالة : ماشاء الله على ذا الشعر ، مو لو انا شعري كماها ، بسألها اي شامبو تستخدم .

مسقطية الهوى : لا تحاولي مافي أمل .

بنت محمد ( بعصبية ) : ماشفت حد يبغض امه غير انتيه ، ترا انا شعري ناعم بس اريده ( سيييده كماها ما يتموج ابدا ) .

مسقطية الهوى : ما بيطلع حلو صدقيني .

بنت محمد : سيري فشغلك ، يالحاسدة .

- يعني بالله عليكم كل هالقتال والنزاع عشان انا قلت خلقت ربنا احسن واذا حطينا شعر غير شعرنا ولاانف غير انفنا نطلع كأننا كائنات فضائية !!!

***********

- الحين بكلمكم عن ( الطفرات الجينية ) لما تتحقق في الانسان العماني .

( العيون الملونة ) كمثال :

العماني لما يشوف عماني تحققت فيه الطفرة الجينية وعيونه ملونة . ردة الفعل تكون إما :

عماني 1 : أكيد مخلط وأمه عنجريزية .

عماني 2 : شكلها الجدة غلطت ايام البرتغاليين .

والتعليق الأخير سمعته أكثر من مره وكنت كل مرة اسمعه انصدم اكثر من المــــرة الي قبلها وأقــــول في نفســـــي : ( WTF!!!!!)

يعني اذا جاكم الشين قلتوا : منا وفينا ، واذا جاكم الحليو قلتوا : متبريين منه !!!!!!!!!!!!

**********

- ننتقل الآن معكم الى تناول ما كان في زمن ما جميلا لم يعد اليوم كذلك .

الفرق بين الاسنان ( مثالا ) .

زمان كانوا يجيبوا اداة ليزيدوا الفرق بين الاسنان اتساعا وتظهر كعلامه من علامات الجمال، مثلها مثل : الشامة او حبة الخال ، او الغمازة .

اما اليوم فحين تكتشف الأم ان ضروس إبنتها فرقات تصرخ بعالي صوتها :

واااابوي طالعة ضروسها فرقات ما اعرف مشابهه من ؟!

وسوف تنتظر ان تكبر البنت سريعا لتضع لها التقويم ولتغلق ذلك الفرق .

*********

وختاما :

- الجمال في عين الرائي .

- والشي الجميل اليوم بكره ممكن ننتقده ويكون قبيح .

- لما تظهر طرفة جينيه المفروض نتقبلها بصدر رحب ، بدل ما نشكك في الاصل ونرميها على راس البرتغاليين والجدة إلي غلطت... ( بلا تخلف ) و( عيب ) .

بنحترق بنذوب بنتبخر بصيح

على فكرة اول ما ركبت السيارة كانت درجة الحرارة 50 بس بعد ما شغلت المكيف صارت 49

هذي درجة الحرارة لما وقفت السيارة في مواقف البيت مع العلم المكيف كان عالاخر

أنا اول ما دخلت السيارة حسيت إني ما قادره افتح عيوني من الهوا الحار الي يلفحني ، حسيت وجهي بدا يذوب ، وأول ما حركت السيارة حسيت راسي بدا يثقل ودوار ودوخة ، وقفت على جنب عشان تتوقف الدنيا عن الدوران ، ولما حسيت نفسي احسن حركت السيارة .

أكيد كل احد لمحني امس في الشارع يقول هذي مالها .. بديت أهّلوس

- لهيمبنخثبنط هسعيتسهيت في رمضان ؟

الترجمة : ( كنت اقول أيش بنسوي شهر 8 في رمضان ؟)

- يفشكنسحجقعشاص طبهثعبتس ذابت يابها هب خها من الخاطر

الترجمة : ( عيوني ذابت خاطري اصيح من الخاطر )

- الله يسامحك اهاب هسايابخيتلهختل ما لقيت نتهيبتلحلني

الترجمة : الله يسامحك يا مالك يا ابن فهم يا ولد فهيمة الازديه ما لقيت إلا هالرقعه تهلكنا فيها

بمناسبه الصياح والبكي أحلى بكية \ صيحة كتابية قرأتها في كتاب ( عايزة أتجوز ) للمدونة المصرية غادة عبدالعال - وانا شكلي بكمل مسيرتها وبكتب ( مش عاوزه اتجوز ) وبجلس أصيح من سيرة الحر والزواج وأبكي مثل ما تبكي شخصية ( برايد ) في كتاب غادة ، وببكي احلى بكيه مؤثرة في العالم وبقول :

عاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

المعزة العاقلة

أخوتي واخواتي طلبة وطالبات الثانويه العامة :) هههههه ياخي كل ما اتذكر البرنامج التعليمي مال الثانويه ايام زمان يجيني مغص واكتئاب وخوف . كان برنامج غلس - الله يذكر كل الي شارك فيه بالخير إذا بعدهم ( يعيشوا ) وإذا الله تذكر أمانته وأخذهم إلى جواره فإلى جنات الخلد . بس والله الاشياء القديمة ( تعلق ) في الذاكرة ، كما ( يعلق ) الحنا على كفوف الصبايا .

على ذكر القديم ، اكيد معظمكم تابع ( ندوة السلامة المرورية ) الي انعقدت الأسبوع ( المنصرم ) - دايما تستوقفني هالكلمة ( المنصرم ) وأجلس افكر من وين جات ؟، ومافي شي يخطر في بالي إلا ( ام الصروم ) فهناك احتمال كبير ان المنصرم هو الشي الي خطفت عليه أم الصروم ، وصرمته فصار مصروما منصرما وحلت عليه اللعنه الصرومية .

ايوا وين وكنا ، في (ندوة السلامة المرورية ) الي كنت اتابعها بعد الغداء وكنت في احيان كثيرة أضحي بقيلولة الظهر من أجلها ، وفي يوم من ايام الاسبوع الفائت شفت الدكتور عبيد الشقصي وهو يستعرض الورقه الي قدمها حول( دور وسائل الاتصال في التوعية المرورية ) . صراحة كانت ورقه شيقة ، لأنها عرضت نماذج للإعلانات المرئية والمقروءة القديمه منها والحديثة .

شدتني طبعا الإعلانات القديمة ، والصورة ( اعلاه ) نموذج لأعلان نشرته جريدة عمان في الثمانينيات ، وقد أنتقد الدكتور عبيد في الاعلانات وقتها حشو الكلمات ، وهو يرى ان الصورة معبرة وكافية لإيصال المعلومة .

عاد انا لما شفت الاعلان والصورة والكلمات وفوق كذا ان هذا الاعلان نشرته ( جريدة عمان ) وهي جريدة حكومية وفي ايام الثمانينيات بعد ! ، وحاطه صورة معزة وفوق المعزة عبارة ( المعزة العاقلة الحذرة تعبر الطريق ) ، جتني نوبه الضحك إلي تسيل لها الدموع والشعاب المخاطيه ( اخييه لوعت كبادكم صح )

وضحكت وضحكت كل الضحكات : لووووووووول ، ههههههههه ،خخخخخخخخخ ، هاهاهاهااااي

ما خليت ضحكته ماضحكتها ، وبعدها جلست مع نفسي جلست تأمل كالعادة وحسيت اني اضحك عالخيبه

الخلاصة الي توصلت لها :

1- في الثمانينيات كان يسمح بنشر اعلان حاد ولاذع يقول فيما معناه حتى المعزة تعبر من المكان المسموح فيه بعبور المشاه ، وانتو البغمان ما تستخدموه !!!

يعني حتى المعز العماني عاقل والانسان العماني ما عاقل ، ولا ايش السالفة ؟!

وعادي محد شطب اي حرف ، اما اليوم فالمقال يوصل الجريدة ( يجز ) ويخلوه رقم 1 بعد ماكان كثيف الكشه .

- لو اليوم طالبنا بنشر هذا الاعلان الي سبق نشرته الجريدة ، بيوافقوا على اعادة نشره او لأ ؟؟؟!!!

طبعا لأ .

احدكم سيسألني : ما كل الماضي جميل ويشرف ، وهذا الاعلان لايرقى بالمستوى وصدامي ..الخ

جوابي : المسألة ما مسألة صح أو خطأ ، يليق او لا يليق ، حلو ولا قبيح . المسألة مساحات التعبير الممنوحة ، هل تضائلت منذ الثمانينيات وإلى اليوم ام زادت !؟؟؟؟!!!

اذا جاوب احدكم بأن مساحات التعبير زادت اليوم عن الثمانينيات ، أتمنى يرفق جوابه مدعما بالإدلة !

عشان ما انام وانا ظالمه مساحات التعبير عندنا :)

أعمدة تطمين القلوب

يقول مقترح العضو النشيط جدا في منتدىسبلة عمان :
دعما لندوة السلامه المروريه اتمنى وضع لوائح على الطرق تحمل كلمة( سبحان الله) كل 5 كيلو !!!!

أكيد إحنا بهالطريقة بنحد من الحوادث لأن " بذكر الله تطمئن القلوب "

بمناسبه هالسيرة اليوم الصباح وانا رايحة الدوام :مرت علي سيارة كورولا عليها ملصقات كثيرة منها ( اذكر الله ، الله الحافظ ، لا إله الا الله محمد رسول الله ) كلها حاطتنها في جامه السيارة الخلفية . الأخ الملتزم بوضع الملصقات - المطمئنة للقلوب - لم يلتزم بأدب المرور ، يتجاوز الناس ويروح يمين ويسار دون اي مراعاة للناس !!!

هذا مثال وليس حصر ، فياريت الي باغي نفسه تهدأ يروح يشتري كم ملصق لسيارته ، اما نروح نصرف من فلوس البلد عشان نسوي لافتات فيها كلمة " سبحان الله " كل خمسه كيلو ! فأنا اعارض وبشدة ، بس في ذات الوقت ماعندي مانع اذا كان الاخ طارح الموضوع مُصر على الفكرة ، يسوي جمعيه خيريه لهذي اللافتات ، او اي مؤسسه قطاع خاص تتبرع انها تحط هااللافتات ، بالتنسيق مع المرور .اما اذا الدولة صرفت فلوسها على هالأعمدة بتصير حق عام .وعاد بتكثر الأعمدة ، أعمدة انارة ، وأعمدة مرور ، وأعمدة الاشاراة الضوئية ،وأعمدة اللوائح الارشادية والتحذيريه وأعمدة تطمين القلوب !! وبنزيد كم عمود للحق العام ، واذا دعمت وكسرت عمود- تطمين القلوب- بتغرمه لأنه حق عام . وياااا دوخة راس ما تخلص .

جاني إكتئاب

يعني ايش يصير لو وفرنا نصائحنا لأنفسنا بدل ما نسم فيها بدن الناس الابرياء ؟! يعني كأن الواحد ماسك لافته عليها مقترح عاطفي سمج ملغ ويقول خلي الدولة تسويلي اياه ، هذي اسمها لافته ( جلط القلوب ) . ما زين والله مازين هذا إلي تسووه فيني ، خفوا علينا شوي

تعمين الأذان

سمعت كما سمع غيري بقرار منع المقيمين من الاذان ، ما اعرف ليش؟ بس اظن السبب الرئيسي للحفاظ على الخصوصية العمانية ، لأن بتلاقي بنجالي يأّذن بطريقته ، وتلاقي اندونيسي يأذن بطريقته ، فأحنا مثل مانوحد ألوان البيوت لازم نوحد الآذان عشان ما نشوه المنظر والمسمع العام .

هناك حقيقة علمية أود ان تصل الى المسؤولين عندنا : هي ان الرتابه والروتين يزيد من احتمالة تعرض الانسان للخرف المبكر .

فما بالك ونحن الروتين حولنا وحوالينا ، ألوان البيوت نفس الشي ، التصاميم تكاد تكون نسخة من بعض حتى في مملكة الشخص وبيته وسكنه بنتحكم اي لون واي شكل ، الحين الاذان نفس الشي نوحده عشان ما نسمع إلا النغمة العمانية للأذان او بالتالي نحافظ على الخصوصية ونقوم " بتعمين الاذان " .

من وجهة نظري الشخصية ،الاسلام دين لم يفرق بين الاجناس ولم يميز بين آذان عربي على اعجمي إلا بالتقوى ، بس اظن نحن مكتفيين بالقشور من لبس وعمامه لكن العنصرية بندعمها ونقول عنها " تكافؤ " ويمكن التكافؤ اتسعت اختصاصاته لتشمل الاذان ايضا . والله ما اعرف ما اريد أتدخل في قرارات الشؤون الدينية ، لأن اساسا محد يريد ياخذ راينا في شي ، فأحسن القرار يطبق وفمي اسكره بقفل .

بعيدا عن المنظور او البعد الديني لقرار المنع ،وانطلاقا من " نظرية المؤامرة" اظن وزراة القوى العاملة لاعبة دور خفي :) هههههه عشان تزيد نسبه التعمين وبدل ما نكون في المركز الاول في احلال المواطنين في المهن على مستوى الخليج او الوطن العربي ، انشالله بنحتل المركز الاول على مستوى العالم !!!

اكيد هذا المنع بدوره سوف يفتح سوق عمل جديد للشباب العماني الطفران ، وسوف يسعى جاهدا ان يعين في وظيفة مريحة بإحد المساجد ، وشي طبيعي يغير "اللوك \ الستايل " ويطول اللحية ويقصر الدشداشه وعمامه بيضا ، وتغيير اللكنه " يعني يعطي الغنة والادغام حقهم " ويرصص على كل حرف " ويطلع وعليه ختم الجودة ! واحتمال كبير يحصل على الوظيفة . لأن توأم الروح خبرتني عن واحد ماكان محصل شغل ، فما كان منه إلا ان غير اللوك وصار مطوع واشتغل تحت مكيف المسجد وظيفة مريحة براتب مجزي ! وهذا كله عشان يتخلصوا من الهندي الي كان يأذن في الحلة !

وعشان التعمين كل شي يهون

وقول للزمان ارجع يا زمان

أحلى شي ان تكون اخبار الزمان الي ما عاصرته في متناول يدك ،، اكيد معظمكم تقرأوا الاخبار او المقتطفات الي تحطها جريدة الوطن يوميا من اصدارتها الأولى في اوائل السبيعينيات والثمانينيات .

تلفتني احيانا اخبار معينة وأستغرب منها واحيانا اضحك من الخاطر ، واقول انا ماكنت مولودة لما صار هالكلام والحين اضحك بس هل إلي يقرأوه في زمانه كانوا يضحكوا مثلي ، ما اعتقد ابدا ! اكيد كانوا ماسكين الجريدة بكل جدية ويقرأوا بتمعن ويهزوا الراس بثقل ورزانة .

ويظل لكل شي حلاوته .

بس هالقصاصة الي تشوفها ( اعلاه ) اكثر قصاصة فيها كمية مقتطفات فطستني ضحك . لدرجة اني محتفظه فيها عشان لما ( المسقطيين الصغار ) يشرفوا على وجه الغبيراء عمان بعطيهم اياها يقرأوها ( اكيد انا مفتترضه انهم لما ينولدوا يعرفوا يقرأوا ويكتبوا ، واتمنى ظني ما يخيب ، مافينا على الصدعان : درسوا ودرسوا ، ينزلوا جاهزين لمواجه الحياة احسن لأني مافيني بارظ أدرس حد ) .

الاخبار التي ستقرأونها الان قد صدرت في عدد جريدة ( الوطن ) رقم 109 بتاريــخ 30/8/1973

1- اصدر جلالة السلطان أمره السامي الكريم بهدم مسجد الخور بمسقط وإعادة بناءه من جديد على الطراز الحديث وتوسيعه كي يصبح جامعا كما أمر أيضا ببناء جامع اخر في روي وهدم جامع نزوى وإعادة بناءه من جديد وتقدر تكاليف بناء هذه الجوامع الثلاثة بمائه ألف ريال عماني .

( هههههه اكيد الشياب والشباب في ذاك الزمان لما سمعوا 100 الف ريال لبناء الجوامع بغت تجيهم الجلطة من هول المبلغ !! مثل ما احنا ننصدم الحين من 100 مليون !! وقول للزمان ارجع يا زمان )

2- غادر مسقط متوجها إلى القاهرة لمباشرة عمله سعادة الشيخ سعود الخليلي سفير سلطنة عمان لدى جمهورية مصر العربية وممثلها لدى لدى الجامعة العربية . وكان سعادته قد قضى اجازته في ربوع الوطن .

-( كان هناك قدرا من الشفافية ، تعرف متى المسؤول اخذ اجازته وتعرفه متى رجع يباشر عمله وتعرف وين قضى اجازته ، ياحليله قضاها في ربوع الوطن وأثرى السياحية الداخلية )

3- بدا المعلمون والمعلمات يتوافدون على مسقط قادمين من القاهرة وعّمان لمباشرة اعمالهم بعد ان انتهت الاجازة المدرسية .

- ( ما أجمل ( نقزت ) البدايات ، تحس والله عيشنا المعلمين ذاك الزمان في جو الواحد يحس فيه انه وزير ما معلم ، متى سافروا ومتى رجعوا ، يعني تخيل معلم مصري اول ما يقرأ ( جرنال الوطن ) بيقول لمراته : بصي كاتبين اني رجعت من الاجازة . ( ونافخ نفسه وحاس بقيمته ) ولما يروح مصر محد يطريه سافر ولا تنيل . والله زمان المعلمين إلي كانوا حملة رسالة ، وقول للزمان ارجع يا زمان )

4- وصل من لندن السيد غالب بن خالد آل سعيد السكرتير الأول بسفارة عمان هناك في زيارة خاصه . كما وصلها ايضا السيد برغش سعيد لزيارة الأهل والاصدقاء .

( الحين الوزير يسافر زيارات خاصه ومحد يعطينا خبر وأول حتى السكرتير في السفارة راصدين كل تحركاته هههههه حتروح مني فين وراك وراك ، زيارة خاصه ، زيارة شغل ، ما يخصنا بنكتب في الجريدة .يعني كل ما حد قرر يسافر يرسل للجريدة اني بروح زيارة اهل واصدقاء عن تكتبوا زيارة خاصه ، ولا كان في ( باباراتزي ) يركضوا وراهم ويترصدوا اخبارهم ، والله ما اعرف ، بس حلوين الوطن شغل جامد )

5- تهنيء الوطن عبدالله محمد سالم الموظف في بلدية مسقط بالمولودتين الجديدتين رابعة وابتسام.

( لووول ماشي موظف يزيد عنده ولد ولا بنت ويمر الخبر مرور الكرام ، تحس الموظف انسان مهم الجريدة بجلالة قدرها تهنيه على المولدتين ، وكله كوم وكلمة ( الجديدتين ) كوم ثاني ، يعني بالله عليكم شي مولدتين قديمتين ، ترا مولدتين لازم جديدتين ، ولا زمان كان في مواليد بايته ولا قديمه . في ملاحظه ثانيه ما يكتبوا القبيلة ، اظن لأن الموظفين ينعدوا على الاصابع يعني لما تقرأ الناس عبدالله محمد سالم كلهم يقولوا : بو فبلديه مسقط ما كذاك :) معروف معروف موصوف موصوف )

6- محمد سالم العدواني موظف بلديه مسقط استأنف عمله بالبلديه بعد ان قضى اجازته متنقلا بين السيب وفنجا والخوض وبركاء .

( هاهاهاهاها بطني يامه بطني من الضحك ، يارب محد يدخل علي، كل ما اقرأ هالخبر ما اقدر اتمالك نفسي تجيني نوبه ضحك عجيبه تتساقط على اثرها الدموع . تو موظف وطالع اجازه مو تبغوله ؟! المسكين هين راح وهين جلس ، لا وبعد " متنقلا " حاسدين الفقير ، وين تنقل ? بين السيب وفنجا والخوض وبركاء ، كان الحسد عيني عينك :)

7- الشيخ أحمد بن هلال الخليلي سافر إلى بومبي ترافقه أسرته للعلاج .

( انا ميتة على التفاصيل ، الخبر ما يكون دقيق ومهني إذا ما قلنا مع مين سافر الشيخ لازم نقول سافر مع مين ومن قام معه هناك :)

8- عاد إلى ولاية المصنعة عدد من الشباب العماني القادمين من الكويت ومن بينهم المشرف الرياضي لنادي السويق .

(كيكيكيكي أسميه محد يروم يتحرك ذاك الزمان ، ( اذا تقرقحت حصاتين كتبوا عنهن :)

9- فاز نادي المصنعة على نادي السويق الرياضي بثلاثة اهداف مقابل هدفين .

( والأايام دول ، اليوم السويق غاسلة شراعهم )

10 - عبدالله محمد الرئيسي موظف بدائرة العمل سافر الى الكويت لقضاء اجازته .

( نريد صور الإجازه لو سمحتوا :) خخخخخ والله حرام ، بس يمكن الناس وحدها ترسل للجريدة تقول اكتبوا عني انا جيت واكتبوا عني انا رحت ، كل شي معقول الزمن غدار والحكمة تقول كل شي معقول )

11- على خلفان القاسمي سافر الى الكويت للإطمئنان على صحه ولده صلاح الذي يعالج في مستشفى الصباح بدولة الكويت الشقيقة .

( الف سلامه على صلاح علامه ايش فيه ؟ الخبر ما دقيق ، ماخبرونا فيه دوده زايده ولا عملية لوز ولا فيه كسر ،،ههه بعدين كيف ما يكتبوا ابو صلاح وين يشتغل ؟ وكم تستغرق مده زيارته لولده ؟ ومتى ناوي يرجع عمان ، وعلى اي خطوط كان مسافر :)

والله اخبار تونس القلب

نغمات وأدعية للتحميل

استخدام ( النغمة الدينية ) من أدعية ، وصيغ إستجدائية ، وألفاظ روحانية للأغراض الشخصية والطلبات الجانبية .
كيف اوضح الفكرة ؟!

النغمة الأولى :
يعني تلاقي الدعاء لنصرة الشعب العماني الفقير !! واعانك الله ياشعب عمان الفقير ، والله معك يا شعب عمان الفقير !!!
تو هذا كلام !
فيه قدر من الملاغه ما طبيعي يعطيك احساس باللوعان .
المشكله دام انه الشخص يستخدم " الكلمة الروحانية والصيغ الدينية " خلاص كلامه قرآن لأعتراض ولا حتى وجه نظر ، يعني الي ما عاجبه ما يعلق عليه خوفا من ردة الفعل والهجوم الي بيلاقيه ، والاغلب طبعا " امبااع " : صدقت اخي الكريم ، في ميزان حسناتك ، تقول الحق والصدق ، امين الله يستجيب منك ومنا .
- يعني اكيد الواحد لازم يدعي ربه سرا وعلانية ، لكن ما بهذا الشكل ، احس في انتقاص كبير وجلال الدعاء ، يعني تدعوا في منتدى الكتروني ، ولا تدعوا في خشوع فبيتكم ؟!
- في ناس محتاجه نعم في وكثير بعد ، في ناس فقيرة نعم لا غبار على هالكلام . لكن هل شعب عمان كله فقير عشان تدعو الله بقول لك الله يا شعب عمان الفقير !!!
- الدين رفع من شأن " المحتاج " الذي لا يسأل اعطوه او منعوه ! . ونحن ماشاء الله علينا صايرة " الزطوطية " على بيسة ، والمشكله عاد الحين محد يتجرأ يقول انها زطوطية لأنها جايه بصيغة " دعاء رباني " !!
الأمور لا تأتي بالإستجداء ، واذا المواطن كان محروما من حقه فليطالب به ، فذلك حقه وليس منة من احد . اما كل يوم طالعينا بدعاء شكل ، كأننا شعب يحصل لقمة عيشة بالدعاء والاستجداء فليسمح لي ان اقول له :
- ادعي على كيف كيفك ، لكن لا تدعي بأسم الشعب العماني كله ، وتقول انه الشعب العماني الفقير . ادعي بصيغة شخصية : انا فلان الفلاني عماني فقير ...... وكمل الدعاء الي يعجبك .

النغمة الثانية :
المصيبة لما تقرأ الأدعية الي تخص ( تحسين وضع العماني الفقير ) تحس - سبحان الله - انها ما موجهه خالصه لفوق ، يعني تحس انها صيغة غير مباشرة للطلب من القائد او الحكومة . واذا حبيت ان احسن الظن وما اكون شريرة كما ينظر إلي الكثيرين سأقول قد يكون دعاء خالص صادق من القلب يظن الداعي انه قد يرعب المسؤولين فيعيدوا النظر في احوال الشعب ويسعون الى تحسينه خوفا من ان يأتي الدعاء بجزاء وعقاب كفيل بجلب الوبال عليهم .

النغمة الثالثة :
الحين بعد 40 سنة جايين يقولوا نحن ما يعجبنا لفظ " أنعم" و" أكرم " ليش ما يقولوا " منح " او " أعطى " صح اعطى يمكن ما تنفع لأن العاطي والمانع وحده الله عز وجل !!
ويجيك شخص آخر بعد 40 سنة يريد يغير السلام الوطني ويستبدله بنشيد الحرس " ياحي ياقيوم " ليش لأن السلام السلطاني فيه :
ابشري قابوس جاء
فلتباركه السماء !!!
- ما يصير نقول ( السماء !!) هذي الكلمة مثار جدل واختلف فيها العلماء !!!!!!!

- ماعندي مشكله مع الدين ، بس الله يخليكم كل واحد " دينه " حاله . مافي داعي الكلام بلسان البشر كلهم بإسم الدين . ولا في داعي كل ما بغينا شي بدل ما نطالب بحقوقنا نروح نكتب دعاء روحاني .

* وعشان خاطر عيون إلي يحبوا النقل هذي بعض خصائص الدعاء المستجاب ( منقوووووول)

وقال العلماء أن من شروط قبول الدعاء : حضور الذهن والقلب عند الدعاء، فلا يكتفي الانسان بمجرد تحريك اللسان بالدعاء وذهنه خمود العاطفة، بل لابد من الرغبة في الاجابة والرهبة من عدمها، واستحضار عظمة الله
ومن المندوبات : الطهارة واستقبال القبلة والدعاء المأثور،وتحري الأوقات والأماكن المباركة كالنصف الثاني من الليل، وما بين الأذان والاقامة وعند رؤية الكعبة،وساعة الاجابة يوم الجمعة .
عاد القبلة والأماكن المباركة صارت اليوم : المنتديات والمواقع الالكترونية :)

كله ( يكيسوله ) على قوله الوالدة بنت محمد - حفظها الله ورعاها -

أمشي عّدل يحتار عدوك فيك

ما اريد احذركم من ايميل ( دهن العود ) ولو ان التحذير واجب . أود من جميع الأشخاص الذين تلقوا إي إيميل من ( دهن العود ) التواصل معي عبر الإيميل الموجود في يسار مدونتي .
لا أود الإسهاب حول الإجراءات القانونية التي تشغلني بشأن هذا الموضوع في الوقت الحالي ، ولكني أود ان اتناول ردات الفعل الشائعة حول اية محاولة اختراق من قبل الكثيرين للأسف والتي تكشف لنا ضعف الوعي القانوني ، بالإضافة إلى حب اخذ الحق ( باليد ) رغم وجود القانون الذي ( أثار اعجبابي ) لدقته المتناهية في تحديد جرائم الحاسب الآلي ، فلو تناولنا قانون الجزاء فأنه يحدد الآتي :

مادة (276 مكرراً ) : يعاقب بالسجن مدة لا تقل عن ثلاثة أشهر ولا تزيد على سنتين وبغرامة من مائة ريال إلى خمسمائة ريال أو بإحدى هاتين العقوبتين كل من تعمد استخدام الحاسب الآلي في ارتكاب احد الافعال الاتية (*) :


1. الالتقاط غير المشروع للمعلومات أوالبيانات


2. الدخول غير المشروع على انظمة الحاسب الآلي


3. التجسس والتصنت على البيانات والمعلومات


4. انتهاك خصوصيات الغير أو التعدي علىحقهم في الاحتفاظ باسرارهم


5. تزوير بيانات أو وثائق مبرمجة اياً كان شكلها


6. اتلاف وتغيير ومحو البيانات والمعلومات


7. جمع المعلومات والبيانات واعادة استخدامها


8. تسريب المعلومات والبيانات


9. التعدي على برامج الحاسب الآلي سواءا بالتعديل او الاصطناع


10. نشر واستخدام برامج الحاسب الآلي بما يشكل انتهاكاً لقوانين حقوق الملكية والاسرارالتجارية


(*)اضيفت المادة ( 276 مكرراً )بموجب المرسوم السلطاني رقم (72/2001)


مادة (276 مكرراً )(1) :


يعاقب بالسجن مدة لا تقل عن ستةأشهر ولا تزيد على سنتين وبغرامة لا تقل عن مائة ريال ولا تزيد على خمسمائة ريال أوبإحدى هاتين العقوبتين كل من أستولى أو حصل على نحو غير مشروع على بيانات تخص الغيرتكون منقوله أو مختزنة أو معالجة بواسطة أنظمة المعالجة المبرجمة للبيانات .(*)

مما سبق- ترون كما ارى- شمولية المواد لدرجة تجريم الشخص لمجرد دخوله الغير مشروع على اجهزة الغير او الحصول على بياناتهم ، حتى وان لم يستخدم المخترق تلك البيانات .

ربما محاولة المخترق ( دهن العود ) هي تجربتي الأولى مع مخترقي المواقع والهاكرز ، ولكن لم اتردد لحظه رغم سلبيه الكثيرين من حولي من ان اكتب رساله شكوى للجهات المختصة .ولكن دعوني أعرض عليكم جزءا من الاراء التي تلقيتها .

* افتحي ايميل جديد وفكي روحك .

( ما احب الحلول السهله سامحني )

* تو انتي ما خايفة رسالة الشكوى تلفت انظار الجهات الرسمية لمدونتك !

( وكان ردي : حد قالك اني خايفة من ظلتي ! ، وبعدين ليش انا ايش كتبت عشان اخاف !! طال عمرك مسقطية اذا ما قد الشي ما تقوله اصلا ، والاهم اني ما كتبت شي اخاف منه ! )

* انتي للحين تمتلكي الايميل والمخترق ما غير كلمة المرور ، ويمكن يكون ما اخذ شي من البيانات ، ويمكن الموضوع ما يتعدى محاولة إختراق .

( انا ما احب اعيش على الاحتمالات ، ويمكن ويمكن . القانون صريح والواحد لازم يكون في السيف سايد ، يعني لو صار اي شي والموضوع كبر بيقولوا : ليش ما لجأتي للقانون ؟! تريدوني ارد عليهم رد البغمان : ما كنت مفكره السالفة تكبر بهالشكل ! )

* خليني اخترق ايميله وأعلمه الأدب !

( هدي اخوي لا تعلمه ولا تعلمني ، مافينا عالمشاكل ـ ترا اذا صار شي انا وهو بنتحاسب بنفس التهمه ( اخترقني واخترقته ) ومبدأ العين بالعين والسن في السن في مثل هذي الأمور ما ينفع . خلي القانون يأخذ مجراه ( نحن دولة مؤسسات وقانون ) ولا عندك راي ثاني ؟! )

نرجع لمحور حديثنا :

اي شخص تلقى ايميل من المدعو ( دهن العود ) يتواصل معي رجاءا .

( والي ما قرأ القانون بحفّظه أياه )

نصيحة : القت هو اختيارنا الاول

لماذا لجنة حقوق الإنسان ؟!

ولدينا جهات تحدد لون الدشداشه للرجال ، وإلزام لبس العباءة للنساء ؟!!

اندهشت عندما سمعت هذه الملاحظه من احدى قريباتي في جامعة السلطان ، ولكني لم اندهش حين عقبت احدى الصديقات ان هذا التعميم شمل الكليات والجامعات الخاصة أيضا !!

احتدم النقاش بيننا ( وكنت انا وجمع من الاقارب منهم كان من اوائل الدفعات التي تخرجت من جامعة السلطان ، منهم يدرسون الان في الجامعات الحكومية الخاصه ، وانا طبعا : الحاصلة على شهادتي الجامعة من خارج السلطنة - وأحمد الله على ذلك ) ، أقلها طلعت بشهادة وشخصية مستقلة تدرك مالها وماعليها .

بدء الحوار بهذا الشكل :

سنفورة بجامعة السلطان :عمتي انتي لما كنت اول دفعة في الجامعه كان إلزامي تلبسوا العباية ؟!

العمة : لا والله نحن ما مر علينا هذا ..طيط...( قص رقابة ) ،، كنتي تشوفي المحجبة ، وكنتي تشوفي الي ما تلبس حجاب ، كل واحد وحريته طالما ما يخدش حياء الغير .

احدى القريبات ( معلمة ) : بس هذا النوع من التعاميم ، يفرض لأن الطلبة وحدهم يروحوا يشتكوا من لباس زملائهم وزميلاتهم ، فالإدارة تستجيب لمطالبهم وملاحظاتهم .

مسقطية الهوى : الحرمة تقولك اول دفعة في الجامعه كان الكل عايش في سلام وأمان ، وجايين بعد اكثر من عشرين سنة يحددوا عالناس ايش تلبس ، بديت اشك اننا كنا في القرن الحادي والعشرين والحين في القرن الثامن عشر ، تو العالم يمشي لقدام واحنا خصوصيتنا تمشينا لورا ، ولا ايش سالفتنا ؟!!

تدخل عم السنفورة ( خريج جامعه السلطان اوائل الدفعات ) :انا لولا خوفي على مسقطية الهوى لتنجلط ، كنت خبرتكم سالفه عشان تعرفوا الفرق بيننا وبين طلاب هالوقت .

الكل يصرخ : قول قول الله يخليك .

مسقطية الهوى : قول اصلا انا حاسة اني بموت مجلوطة في كل الاحوال .

العم : في سنة من السنوات طلع تعميم ان مافي خروج بعد الساعه 9 او 10 ما اذكر بالضبط ،يعني الكل لازم ينام وما يطلع من السكن ، وفي ناس لما ما كان يجيها نوم تروح تركض او تتمشى في الباحة ، فلما طلع التعميم الكل من اليوم الثاني خرجنا في مظاهرات في الجامعه وتجمّعنا ضد التعميم، والغوا التعميم ولا حد طبقه ولا يوم .

الكل : يالله عليكم أقوياء محد يروملكم .

العم : عيل نخلي حد يحدد لنا متى ننام ومتى نقوم ؟ نحنا ما هوش مثل إلي الحين ، خليهم يستاهلوا اكثر ، وحدهم باغيين يقولوا : امباااااااااااااع

مسقطية الهوى ( مصدومة وعيونها مفتوحة عالاخر ) الكل : لحقوا جيبوا ماي \\ مسقطية ردي علينا ، والله ما يستاهلوا تسوي بنفسك كذاك /\ الله يهديك بس \\ تو هم راضيين انتي ليش مستحرقه \\ شهادتك في يدك وفارضه نفسك \ خليهم يغيبوا . رشوا ماي على وجه مسقطية عسى تنطق

مسقطية الهوى ( اخيرا نطقت ) : امبااااااااااااع

( ملاحظة : المتابع الجيد للمشهد العماني سيدرك انها ليست مقاطع من وحي الخيال - لاسمح الله - )