الاثنين، 3 أغسطس، 2009

انخدش حيائي


توني راجعه ، صحيت 6 ونص وبوزي ما قسته كم شبر ، متنكدة نكد الدنيا . اكتشفت ان توأم الروح كان لها فضل كبير لما تصحيني من النوم صح اني اعصب بس على الاقل ما اتنكد هالنكد واكيد احظى بنعمه النوم بليل مثل العالم والناس . بس اليوم طبعا شكلها صباحي .

المهم ما هذا موضوعنا .

هجمت علي الوالدة : يالله قومي وديّني روي والخوير ومدينة قابوس والقرم ..الخ

مسقطيه الهوى : خيرّّ!! .. كل هذي المشواير ومافي الا اليوم ، حبكت يعني يابنت محمد .

الوالدة : خلي عنك قومي . انتظرك في السيارة .

مسقطيه الهوى : وين رايحة . انزين شلي المفتاح اول .


ركبنا السيارة ، فتحت الراديو قبل المكيف . عصبت الوالدة وسكرته .

الوالدة : هذا انتيه ، والي فالحه فيه . اول قولي دعاء ركوب المركبات . ايش يقول ؟!!

مسقطية الهوى : !! ركوب المركبات . وايش يقول ؟ استغفر الله العظيم .

مسقطيه الهوى : ردي وراي " سبحان الذي سخر لنا هذا وما كنا له مقرنين ، وانا الى ربنا لمنقلبون "


توكلنا على الرحمن وفتحت اذاعة ... مابذكر اسمها عشان مايقولوا شهرتي فينا ، بس هي الي فيها قوم " كبه نيه : وتبولة "

بدينا رحلتنا بروي ، قلنا ( نقط الهمة ) لأن مشوارها اهم . انا وامي ساكتين لأن مافي بينا مواضيع ( ذات اهتمام مشترك ) جلسنا نسمع المذيعه ومسجاتها ، الحلقة ما كانت في بدايتها بس ما اعرف مسوين مسابقه ولا ايش ، لأن كل المسجات فيها نفس الجملة .

المذيعة : مسج من شعشبونه مسقط تقول فيه " مسيناكم مسّونا " .

المذيعة : مسج من ابوالحواليس يقول فيه " مسيناكم مسّونا" .

المذيعة: مسج من الجكر كله تقول فيها " مسيناكم مّسونا" .

...................................................

وظلينا على هذا المنوال لين ماوصلنا "روي " . نزلت الوالدة وانتظرتها في السيارة ، وانا انتظر اغنيه ولا فاصل مافي شي ، كله " مسيناكم مسّونا".

المهم ركبت الوالدة .ركبت الوالدة وشكلها معصبة من الخياط . وسمعت المذيعه تقول : مسج من دحدوح يقول فيه " مسيناكم مسّونا".

ما اشوفلكم الا الوالدة ، هابة فيني هبة ، وشوية وتكسر الراديو ، وتشد الحزام وسكرت الراديو . وحمرّت خدودها من العصبية ، وانفجرت قائلة : " مالها هذي مسيناكم مسوّنا " من اول ما طلعنا من البيت ، هلكتنا . قلة حيا. صحيح الي اختشوا ماتو . ...........

الوالدة ماخلت كلمة . وانا لمّا استوعبت ، الخلط الي صار بين اغنيه السيدة فيروز الشهيرة " مسيناكم مسّونا " والمعنى العماني لكلمة " مسيناكم " . انخدش حيائي ، قدام الوالدة . وما عرفت ايش اقول .

المهم سكرت الاذاعة ، ورحنا الخوير وخلصنا . وحاولت اقنع الوالدة اني تعبانه وما اقدر اواصل المشاوير ونكمل بكره ، وقالت لأ ، بعدنا نروح القرم . اكيد انا ضربني غم وبوزت . وقلت عناد بفتح الاذاعة .


واذا بالمذيعة تقول " مسيناكم مسّونا "
امي مسكت الباب ، وقالت :" والله بفتح الباب نزليني " وانا جلست اراضي وابوس راسها في نص الشارع . لحد ماهدت شوية.
..................................................................................................................


نداء لكل المذيعين والمذيعات في الاف ام : " رجاءا خذوا بالاعتبار ، ان في كلمات لها معاني مختلفه من بلد لآخر ، وقد تسبب لبس لدى المستمعين" .

اكيد محد يجرؤ يقول ان والدة مسقطية الهوى تفكيرها " مدبلج " ، والله اشرحه واكله بأسناني . بس بالفعل عماني قح ولا عمانية قحة ، بتسمع " مسيناكم مسونا" بالذمة ايش بيقولوا : " الله يمسيهم ويمسينا بالخير والنور " !!!




الصور :

إلتقاط : مسقطية الهوى

الاثنين 3-8-2009