السبت، 6 يونيو، 2009

ايش دخل الطين في اليقطين


تنويه :محد يسألني عن العنوان لأني ما اعرف علاقته بالموضوع بس خطر في بالي وكتبته .


مثل ما انتو شايفين بالصوره امامكم هذا مستحضر اسمه " مربى الزنجبيل " . تم وصف هذا الدواء ل " مسقطيه الهوى " بعد اصابتها بكحة مزمنة لاتهدأ سوى بالتقيؤ. اعرف لاعبت كبادكم من تقيؤ " مسقطيه الهوى " بس الله يعينكم اتحملوا شوي . يعني كل واحد فينا له لزمة مثلا : في واحد اسمه المهذون الاكبر في كل شي يحشر الحر والصنان وانا بس اقرأ الكلمة اتلوع ، وقلت في نفسي اكيد الي يقرأ عن ترجيع ولوعة " مسقطيه الهوى " يحس نفس الشعور . وفي واحد ثاني منى عمره وسنينه انه يغازل وتضبط معاه . وفي واحد ثالث كله بس كاره نفسه وكاره صنف البنات من وحده كرهته في حياته . يعني عادي كل شخص فينا له سالفه يدور حولها ، وكل مايبعد شوي يرجع لها مره ثانيه . اعرف بتقولوا الحين " مسقطيه " بدت في رفع الضغط وماتكلمت عن قصه " مربى الزنجبيل" . طيب ،، بعد اصابتي بالكحة المزمنة ، وإلي اكتشفت انها مزمنة بعد ما تخلصت تماما من اعراض الزكام والحمى الي كانت قبل شهر . كل شي راح وبقت الاخت" كحة " منكدة عيشتي . هي " كحة" فريدة من نوعها، يعني اول شي احس بحكة وبعدين بشرقه ، وبعدين اكح لين ما يحمر وجهي ، وينقطع الاكسجين عني وبعدها أرجع وارتاح شوي ، عضلاتي تعورني من هالكحة الشريره ، طفشتني . ماخليت شي : شربت 3 قارورات من دواء الكحة- عجبتني قارورات- ، وشربت عسل مع كل شي تقريبا. مثلا : عسل مع زنجبيل - عسل مع كركم - عسل مع حليب- عسل مع شاي - عسل مع عصير ...الخ الخ . ومافي فايده . وفي احدى المساءات الجميله - جات الوالدة ( الله يطول في عمرك يا ماماتي ) . ومعاها الخلطة السحريه . امي ما قرأت الي على العلبه لأنها ببساطة ما تقرأ . ما اريد اقول : اميه ، ولا انها ما تعرف تقرأ. لأنها امي حبيبتي وهي ماكنت السبب ، الله يسامح جدي . هو السبب .هي حاولت تروح محو الاميه بس صارت معاها قصه بحكيلكم اياها في موضوع اخر. المهممممممممم بعد ما جات امي بخلطة الزنجبيل السحريه قالت لي بكل تفاؤل : هو هذا مافي غيره ، بيفيدك . وانا عيوني طلعت من الفرحة ورحت اركض من بعيد - وصار فلم هندي - زين ما طحت من الدرج واصرخ بأعلى صوتي : ارييييد اثووووف . ولما مسكته وقرأت الي فيه . تفائلت في البدايه وبعدين حسيت شويه احراج بعد مواصلتي لقراءة السطر الي فيه ( فوائد وحسنات استخدام هالخلطة العجيبه ) . شكرت امي وحطيت بوسه على راسها وركضت غرفتي . حطيت علبه الدواء قدامي ، وقابلتها وجه لوجه . عشان احدد موقفي اخذه ولا لأ . قرأت إلي على العلبه مره ثانيه :

السطر الأول " مربى الزنجبيل "

يمي يمي شكله لذيذ ومشجع .

السطر الثاني : مفيد في البلغم ، ومقوي الجماع ، ومفيد في امراض الحلق والتهاب الصدر والسعال والبرد .

- يكفيكم حرف " في " الفضائي. الي ما اعرف كيف يكون شي مفيد في ؟! يعني مفيد في البلغم ، يعني ينّحط في البلغم وبعدين يكون مفيد ولا ايش السالفه ؟

- اما الطامة الكبرى فهي اكيد مثل ماهي واضحة امامكم بالخط الاحمر : مقوي الجماع ! يعني السطر من اوله لآخره يتكلم عن السعال والبرد والحلق والسعال وفجأة يطلع لك الفطر بين الفراولة . ايش جاب السكس الحين . بس هيك " السوق بدوه " . يعني اي شي مايمشي حاله في الوطن العربي الا نحط عليه كلمه سكس ومقوي وخلاص الناس بتهجم . الله يزيدكم من خيره . ذبحتوني بتخلفكم . الحين ايش اسوي ها ؟ . اشرب ولا اتنيل واتعذب من الكحة . زين كذا حيرتوني ؟!! المهم انا " ذقت " شويه عشان ما تظهر اعراض الزفت الي حاطينه ولواني اعرف انها المفروض ما تأثر الا على الذكور بس الاحتياط واجب .


مشكله حشر كلام عن الجنس في اي شي صار مستشري . اكيد الناس من فتره صدعت راسنا انه في ادباء يحشروا الجنس حشر في كتاباتهم، وهذا موضوع قديم ، واعطوه حقه وزياده من النقد والهجوم. بس مافي احد ينتقد بالشجاعه هذي الاعلانات الي نتصبح فيها كل يوم فالجرايد . بل ان حشر هذه الالفاظ اصبح حتى في المقالات ثخينه المستوى . يعني قبل ايام قرأت خبر عن حكم صدر بمحتال غشاش من احدى الجهات المختصه، وبعد سرد تفاصيل الاحتيال واساليبه ، قرأت في النص وتم العثور على : ادوات واشرطة خلاعيه . ايش جاب لجاب . يعني هذا المحتال له اهل وناس تعرفه مافي داعي لمثل هالكلام ، ثم انه مافي احد مهتم انه يحاسب على اشرطته المخلة بس الناس مهتمه بمحاسبته على الاحتيال الي بخر اموالهم ومدخراتهم .المهم لما سألت احد القانونيين في السلطنة قال : ان لو حصل وتم تفتيش منزلك او هاتفك بقضيه سرقه او قتل ، واثناء تفتيش الجهات المعنيه لهاتفك او منزلك ووجدوا افلام خلاعيه ، تتحاسب بتهمه ثانيه : الي هي حيازه مواد مخله بالاداب . يعني زدت طينك بله . انا مع تقنين حيازه مثل هذي المواد لكن موضوع محاسبه شخص عليها بدون شكوى تقدم بها شخص اضره اقتناء شخص لهذه المواد اعتبره امر غير معقول وغير واقعي . ولو كنا بنحاسب على هذا الاساس كان زمان 98% من الشعب بيكونوا مدانين بحكم هذي المادة . ماقادره استوعب التناقض : يعني تتحاسب على مادة خلاعيه تشاهدها بنفسك وما نشرتها ولاخدشت فيها حياء احد امر جائز ! اما مشاهدة الرقاصات في المراقص والبارات فهو امر ما بيجرم عليه احد ، والاسويات وجنسيات اخرى تبيع نفسها في الفنادق امر عادي ونغض البصر عنه .


توقيع اليوم:( ذبحتوني بإنفصامكم )


تفاصيل الصوره :

التقاط : مسقطيه الهوى

2-6-2009