غادرنا اليوم احد الكفاءات الشابه المتميزة. رغم اني سأفتقد زميلا خلوقا خفيف الظل، ربما يكون الوحيد الذي اتعامل معه بشكل تلقائي وبكل اريحيه ، ابتداءا من يوم السبت سأضطر ان اتعامل مع الاجلاف. اذكر اني قرأت احد المدونين الاكارم وقد كتب عن دفاشه العمانيات وجلافتهن ، اود ان اقول له بكل مودة: بأن شباب عمان ليسوا بحال افضل ابدا . ورغم هذا لانعمم هناك لطيفين ولطيفات .والاجلاف هم نتاج بيئه جافه جلفة . اتمنى ان يتعرفوا على شيء اسمه ذوق واتيكيت في القريب العاجل .
لنرجع الى من غادرنا وخسرناه - اعني خساره العمل لشخص مميز اخر . نعم ،، هو ليس بالاول وليس بالاخير القائمة تطول ،ومازال النزف مستمرا. لا استطيع ان الومه ، فكما يعلم الجميع ان القطاع الحكومي بالاخص ليس مكانا لأصحاب الطموح . العروض المغريه تنهال على الكفاءات من الشركات الكبرى . ما يحز في نفسي ان القطاع الحكومي لن يتطور ابدا بالعقول الأثريه الموجودة فيه والتي حتى الزمن - لاعت كبده - منها . في الوقت نفسه العقول القديمه لانستطيع ظلمها كثيرا ، فمنهم من صقلته سنين الخدمه الطويله ومنهم من يقف حجر عثر امام كل جديد. يا الهي كم اكره تلك الحفنه التي لم يقدر لها ان تحصل على شهادات عليا وتشعر بالحقد اتجاه الشباب من حمله البكالوريوس وحتى الدبلوم لم يسلم من حسدهم . وياعيني وياليلي ، لما احد من الحساد يتولى منصبا اداريا وماليا ، يعني بتشوف تقنيات الحسد على اصولها . وكل الدورات الي توصل للجهة تحفظ في الادراج وكل المكافات تروح لشاربي الشاي وقارئي الجرائد طيله ساعات الدوام . من ما بينقهر في بيئه مثل هذي ؟! بيئه اسنة شعارها ( اذا لم تكن حاسدا اكلك الحساد ) . المهم ،، الشباب يقولوا باي باي ويقبلوا عروض بالفعل من الغباء رفضها ، والقطاع الحكومي يقبع فيه من ليس لديه فرصه في مكان اخر وهو منتهي الصلاحيه في نظر جميع الجهات الشابه الفتيه . استقاله زميلنا حركت المواجع وفتحت باب حديث شيق مع احد الخبراء الاجانب الذي اكن له كل الاحترام . فأنا مع تعيين الخبراء الاجانب ان كانت دواعي العمل تتطلب معرفتهم وخبرتهم الواسعه ولكني ضد توظيف الاجانب في الوظائف التي تقل عن درجة خبير او مستشار ، اشعر انها تأخذ فرصه العماني وفيها اهدار لمال يستحقه ابن \ وبنت البلد اكثر من اي وافد . هذا الحوار الذي دار بيني وبين الخبير ، اتمنى لكم قراءه مضحكة مبكيه كما حدث معي :
الخبير : اه يامسقطيه الهوى قسيت على (حميد)لما جاني يودعني كنت اتمنى لو ما استقال .
مسقطية الهوى : تريده يرفض عرض مغري مثل هذا ويجلس هنا لادورات ولا فرصه لإكمال تعليم ولا شي.
الخبير: لوكمل السنتين على الاقل كنت ناوي اقنع المسؤول انه لازم يسافر برا يكمل دراسته .
مسقطيه الهوى : انت ماقصرت ، بس تذكر ( سالم) و ( حمد ) و( هلال) سافروا وكملوا الماجستير وبعدها طاروا للجهات الثانيه وما استفدنا شي . اذا الوضع ما تغير من الداخل ما في احد بيجلس. ولا تنسى ( خالد) و( وعيسى) ، ( وعبيد) ،و( سعيد) كان عندهم دبلوم وكملوا دراستهم على حساب الوزاره وبعدها طاروا مثل ما طار غيرهم .لاتزيدني غم كنت شوي وببكي لما جاني ( حميد) يودعني.
الخبير : والله كلنا تأثرنا بس ايش نسوي ، كلامك صح الكل بيطلع اذا الوضع ما تغير .
مسقطيه الهوى : كله كوم ولما نوظف اجانب بأضعاف الراتب . والعماني لو طلب 100 ريال زيادة قلنا ما في .
الخبير : تصدقي مره واحد اسيوي قدم على وظيفه عندنا ،وتمسكنا فيه بشده . الاستاذ كان في \حلستان ياخذ 500 ريال عماني .لما عرف ان الوظيفه عندنا بتعطيه 800 ريال غير السكن والسياره . رسل رساله : طلب راتب 1000 ريال. ردينا موافقين ، كنا محتاجين نوظف احد في هذي الوظيفه وكانوا يريدوا اجنبي مع ان الخبره المطلوبه ممكن تتوفر في عماني .
مسقطيه الهوى : داخل مزاد الاخ وين عايشين ؟!!!
الخبير : لاتستعجلي يامسقطيه الهوى . انتي للحين ما سمعتي شي . الاخ بعد ردنا على الموافقه براتب 1000 ريال غير السكن والسياره والتأمين الصحي وغيره من المميزات ، رسل رساله وطلب 1600 . مره ثانيه وافقنا . تخيلي البجاحه رسل رساله ثانيه وطلب 1800 وفوقهم يريد ( بودي جارد) !!!!!!!!!!!!!!!!!!!!!!
مسقطيه الهوى : ههههههههههههههههههههههههههههههههههههههه
والله مت ضحك وعيوني دمعت . قلت : زين ماوافقتوا بعد !!
الخبير : لاحسينا انه زودها !!
مسقطيه الهوى : حسيتوا بس لما طلب البودي جارد ، زاد راتبه 3 مرات وقبلتوا لما طلب بودي جارد استغليتوا عليه .
ارجووك ( give me a break)
انا والخبير اصحاب يعني لاتسغربوا من رفع الكلفه بينا . وهو ضميره صاحي وياريت كل الخبرا مثله بالفعل واقف مع كل عماني ويستغرب من حسد بعض ابناء البلد على بعضهم . مو كل الوافدين مثل بعض ومو كل عماني حاسد .
القصه حقيقه مو مزحه مثل ما انا فكرت . الخبير قال اذا مو مصدقه رسائله مازالت محفوظه عندنا وممكن تتطلعي عليها . صحيح ان عيني دمعت من الضحك بس قلبي كانت دموعه حسره ووجع .
الخبير انهى حديثه بالقول : والله لو وظفنا بوش ما بنجيب له بودي جارد بنجيب لراعي حلستان !
مسقطيه الهوى : ونحن نريد مظله عن الشمس صارلنا سنه نطالب فيها محد عبرنا .
توقيع اليوم :( موتوا حر )
تفاصيل الصوره :
رسم : مسقطيه الهوى
الاربعاء 3-6-2009
