في يوم الاربعاء الموافق 27-5-2009 فقد (my baby ipod) ذاكرته ، والتي سعيت منذ شراءه على ملأها بشتى الاطياف الموسيقية. سنتان وشهرين هو عمر هذا الصغير ، نفس عمر سيارتي . فأنا أكتفيت بشراء ( مشغلات الام بي 3 ) ايام الدراسه والسفر ، وقررت شراء ( الايبود) بعد شراء سيارتي- تلك الدلوعة _ سنتحدث عنها يوما ما حتما . كان( الايبود الصغير العثول ) مدللا جدا، ورغم ذلك راعيت في نشأته ان اكون صارمه معه بعض الشيء وان لا انجرف الى ملأه بكل ما ُيسّوق له برنامج( i tunes) المختص بتشغيله ، وشمرت عن ساعداي لأبحث مطولا عن كتب مسموعه اضيفها إليه ،واطعمته الحان السيموفونيات الشهيره ، والموشحات الاندلسيه ، والاشعار المغناة للحلاج ومحمود درويش وغيرهم . ولم انسى ان اطعمه بتراث الخليج وجلسات السمر والسلطنة ( اه اه على نوال وهي تغني في الجلسه مسموح يلي تعذر ، ولا محمد عبده وليالي المعازيم ، ولا ابوبكر سالم ياعيني على ابو اصيل وهو يصدح كما الريشه -وشلنا يابوجناحين يكفي صوته فأي اغنيه عشان اعطي نفسي (بريك) ، و اه على ليالي الشام واغاني فضل شاكر وهو يغني للكبار : قولوا لعين الشمس ماتحماش ، وانا رمشي ما ذاق النوم وهو عيونه تشبع نوم ) ، ولا غادة شبير ، وجاهدة وهبي واغانيهم الراقيه العجيبه ، ومرسيل خليفة ، وأميمة . وهناك عدد من الاغاني الوطنيه واغاني ايام حماس خليجي 19 . ولا اريد ان اتكلم عن الاغاني الاجنبيه ، يالله قلبي بدا يعتصر ، اغاني إنجما ، وايرا ، والتون جون ، واغاني البلوز والجاز ومغنيتي المفضله ( بيلي هوليداي) واغاني بوب مارلي ، وكم هائل من اغاني الميتال والهارد ميتال لما اريد افجر راسي واجن ، واغاني الراب الانجليزي منه والعربي ،وكم هائل من الاغاني الخفيفه واخرها اضافه على ما اذكر اغنيه : المطافي !! انا اسمع كل شي لاتستغربوا اذا اصدمكم من الراب إلى الاوبرا . ولا ننسى الاغااني الاسبانيه الي اضفتها الى قائمتي لما درست كورس الاسباني . وايش بعد والله كل الي ذكرته قطره في بحر المكتبة الصوتيه المميزه والمتنوعه الي عندي،، قصدي الي كانت عندي . والله انا خايفه اذكر كل الي فيه ما ابدأ في الصياح والبكي . لأني كنت متأثره طول الفتره الماضيه ومن شدة التأثر ما قدرت اكتب عن الموضوع اول ما صار الي صار ، انتظرت فتره عشان اهدأ وما اريد اقلب المواجع اكثر اليوم.
اكيد اغلبكم الحين يقول : " خلصينا قولي كيف اتنيل الزفت وفقد ذاكرته ، لو قال احدكم زفت ولا اي كلمه ينتقص فيها من شأن عثولي الصغير ، فليعلم ان مسقطيه الهوى زعلانه منه وليتبؤ مكانه في البلاك لست \ القائمة السوداء القاتمه جدا "
هذا إلي صار وعلي جرى \بس لما تيجي و انا احكيلك علي جرى ، وامسح دموعي بمنديلك علي جرى
كنت انا وتوأم الروح نتمشى بالسياره ، وحاطين الأف ام ، وكعادة مسقطيه الهوى ماممكن تسمع قناه اف ام لأكثر من 10 دقائق ، طفقت اغير القنوات وتوأم الروح معصبه وكارهه نفسها فريت راسها فر ، إلى ان سمعت اغنيه لفتتني وليتها ما لفتتني : كانت الاغنيه تقول :
خله يروح ، الله لايرده ، حبك راح وعدى \ وعساك بهالحال واردى !!
توأم الروح تجننت عالاغنيه ، وانا جنيت على نفسي ورحت ادور الاغنيه من النت عشان توأم الروح الغاليه ، يومين وانا ادور وبعدها حصلتها . فتوأم الروح لما عرفت ان الاغنيه صار ( ايبودي الصغير) يتغنى بها ، اصرت انها تاخذه . كان قلبي مش مطمن ، مترددة واحاول اتهرب بس هالكلام ماينفع مع توأم الروح اي مقاومه بحصل بوكس \ لكمة محترمه على شدغي الايمن وعلامه مدخوّسة تجلس كم اسبوع . عطيتها الايبود وياريتني ماعطيتها . بعد يومين قلت لها :خلاص اريد الايبود مالي ، صرخت : ارجعه بكيفي وعناد ما بعطيك اياه اليوم مع اني كنت ناويه اعطيك اياه . مسقطيه الهوى انطمت وتخزت كالعادة . يوم الاربعاء الي صادف التاريخ المذكور اعلاه وتحديدا الساعه 1 والربع ظهرا وانا في الدوام ،اضارب اي شي قدامي ، اتاني اتصال من توأم الروح قالت : حياتي انتي وعمري وروحي، انتي اغلى من عرفت ، يا اجملهم واحلاهم ،انت شيختهم والله . موشح المدح كان اطول من كذا بس انا اختصرت ، لأني رفعت ضغطكم بما فيه الكفايه ، رديت بتردد وخوف : ايش سويتي ؟! من الاخر ، انطقي . قالت : لما تطلعي من الدوام وترجعي البيت بخبرك . قلت لها : لأ الحين الحين اريد اعرف . قالت : لما توصلي البيت . وسكرت التلفون الجبانه . اه عيشتني قلق عمري ماعشته الا ايام الترايات وتدريب السواقه . وانا في الطريق للبيت ضربت اعشار في اسداس وماعرفت الناتج لأني -لوح في الرياضيات من يوم يومي . فقلت يامسقطيه الهوى فكري بطريقه فلسفيه الطريقه الرياضيه وضرب الاخماس في الاسداس وهالسوالف بتتعبك اكثر لأنك اساسا مافالحه في الارقام . سمعت كلام عقلي وطفقت اتفلسف في نص الشارع ، يخطر في بالي ، يمكن ضيعت الخاتم الالماس الي اهديتها اياه وطاح في البالوعه . يالله فكره الخاتم خوفتني والسياره فجأه شاحت لليسار زين محد جنبي . امم فكره ثانيه : يمكن توأم الروح ناويه تحلفني بالغالي عشان احط (في كول) بدل (جونسون )! لألأ مثتحيل . بضايق وبترفس كم يوم لأنها لو سوت هالحركة ما بقدر اردها . اففف خطرت على بالي افكار كثيره ، وقفزت على اكثر من مطب من السرعه الزايدة وشرودي التام . بس وصلت البيت على الخير . اول ما وفتحت باب الغرفه مسكت التلفون واتصلت : يالله قولي ايش صار . ردت : ارجوك سامحيني ، اسوي اي شي عشان تسامحيني والله ما عارفه كيف اخبرك بس ............... الايبود . انا: ايش فيه الايبود : ضيعتيه ، شوفيه تحت السيت ترا هو صغير ودايما احصله متخبي تحت الكرسي. دوريه زين ما يروح مكان اكيد بالسياره . توأم الروح :... ماردت بعد صمت ..................................... انا بالغلط ضغطت زر ومسحت الي فيه ،.................................................................. مسقطيه انتي معاي ؟!!
اي مسقطيه واي زفت انتي خليتي فيها مسقطيه ، مسحتي كل شي يالظالمة ايش هالزر الي ضغطيه، سنتين وانا اضيف لمكتبتي السمعيه وانتي بضغطه زر تريدي تقتليني ؟!! انتي عارفه كيف احبه ، انتي كل شي احبه تدمريه ، وبعدين انا كم مره اقولك لاتتعبثي بشي ماتعرفيه ، انا والي هي انا ( مسقطيه الهوى ) ما اعرف من برنامج ( الايتيون) الا كم زر كيف اضيف الاغنيه وكيف امسحها وكيف افصل الايبود بشكل سليم عشان ما امسح الي فيه . وانتي ما مخليه زر ما تتعبثي فيه وتجاربك هذي ما اخترتي تطبقيها الا على الايبود الصغير . ايش هالشر !! ............................. وبدت السمفونيه المسقطيه ، واستحرقت وبكيت من الخاطر .
احس اني هديت هالفتره ، وصرت اقول : عسى ان تكرهوا شيئا وهو خير لكم . يمكن انمسحت ذاكره كان لازم تنّمسح عشان تتعرفي على عوالم موسيقيه اخرى ، وتضيفي كتب صوتيه ثانيه ، وسمفونيات جديدة ، واغاني روسيه وايطاليه .........
اذن مذكرة جديدة ، صفحات ناصعه ، تنتظر بشغف ان الطخها ، وانا على اتم الاستعداد.
تفاصيل الصوره :
التقاط : مسقطيه الهوى
الاثنين 1-6-2009
