الأحد، 29 أغسطس، 2010

هم يتحرشوا فيني


تضم شاشة لتوضيح درجة الحرارة .. مظلات حديثة للركاب على الطرق

أعدت وزارة البلديات الإقليمية وموارد المياه خطة شاملة لإستبدال مظلات انتظار الركاب الموجودة على جانبي الشوارع العامة في مختلف محافظات ومناطق السلطنة بأخرى حديثة تتميز بمنظرها الجمالي وباحتوائها على عدد من الخدمات التي يستفيد منها المسافرون حيث تضم هذه المظلات زوايا إعلانية وبعض الخدمات والتي تشمل ساعة الكترونية وشاشة لتوضيح درجة الحرارة وخارطة المنطقة ومواعيد حركة حافلات النقل الوطني.


أحاول اني اصوم بدون ما أبطل صيامي . بس في ناس مستكثرين علي اكسب الأجر ومصرين اني اسب وألعن .

يقابلني " مصخ " جديد اليوم. حتى " المظلات " لم تسلم من مشاريع " الخرف الإقليمي" . أصلا انا ناسية ان شي عندنا " مظلات " من اساسه ، وجلست أتذكر اذا صادفتني اي وحده في الشارع في يوم من الايام ؟ . وين يا مسقطية وين موجودة المظلات ، وبعدين تذكرت ان في " مظلات " حالهـــا حــال " جسور المشاة " محد يستخدمهااااااااااااااااااااااااااااا ! والحين بنركب فيها مقياس درجة حرارة ، واعلانات ، وخرائط للمنطقة ، ومواعيد حافلات النقل الوطني ، عشان احنا في " جنيف " والجو روعة !

الظاهر هذا النوع من المشاريع ما يطلع الا بعد اجازة الصيف . بعد ما الناس تروح اوروبا هاربه من حر عمان . يرجعوا من هناك مستلهمين من افكارهم ناسيين إحنا وين عايشين !!!!!!

بالله عليكم " المظلات " من يجلس داخلها ؟!!

اصلا الناس توقف جنب المظلات تنتظر التاكسي او الباص !!! ليش ؟

لأنهم يجيهم " اختناق " من الحر داخل " المظلات " ، على الاقل برا شويه " هبوبة " تهف عليهم .


من باب أولى اذا يعني واجد هامنكم هذا الي المسكين الي يوقف ينتظر " تاكسي " في الحر :


1- هالمظلات سووها مكيفه ولا فيها مراوح .. بدل ما تحطوا فيها شاشه تعرض درجة الحرارة !!! كأن العماني ياحليلة ما يطلع من بيتهم ما شايف درجة الحرارة لأنه يخاف على بشرته ! ما كأنه المسكين جالس " يكدح " على قولتكم والحلوطيه الله لازادها !


2- ابسط الايمان تطبيق نظام " العدادات " وتوحيد تسعيرة " التكاسي " . عشان ما يتعرض الاستغلال الجشع الحالي لحاجة الناس ! . بدل ما تحطوا له جدول بمواعيد باصات النقل الوطني !! أو انكم ناويين تخفضوا دخل الفرد العماني عشان في المستقبل محد يقدر حتى يشتري سيارة وبيصير النقل الوطني هو وسيلة تنقله اليومية !! أبشركم اساسا احنا أقل دخل فرد في دول الخليج العربي ، فأحسن نطلع من حسبة دول مجلس التعاون بكرامتنا ونروح مع اليمن !


يارب سامحني بس هم إلي " يحرشوا فيني " :)

هذي نفس النكته إلي تقول :

واحد رايح الحج وخلاص كان ناوي يتوب من التنكيت على البغمان

وهو في الحرم ، اقترب منه بغام وسأله : اخوي في مسجد قريب ؟

الرجال جلس يبكي ويقول : والله ياربي هم الي يتحرشوا فيني :)

شكرا خاص : لأبو ماضي على الصورة المعبرة . :)