الجمعة، 4 سبتمبر، 2009

قرنقشوه ومناسبات اخرى

شوية زينة على جدران الحوش لعيون القرنقشوه
هدايا القرنقشوه شوية تطوير عشان اطفال الجيل الجديد

مرجل الفّراخ " قلت لكم محضيرين للمناسبة من الخاطر


كيكة ( بنت سلسيدو) الي تبجّلت فيها بدون علمنا وأكلتها وحدها جزاء لها لما كسبت يداها



مرحلة 1 لتحضير كيكة الفراخ والحلوى




مرحلة 2 لتحضير كيكة الفراّخ والحلوى














مرحلة3 لتحضير كيكة الفراّخ والحلوى






الحريقة



اليوم الخميس ، ويمكن انا ذكرت لكم ان هاليوم هو يوم ( الجمعّه ) العائلية ، فيه نحتفل بكل المناسبات : عيد الام ، اعياد الميلاد ، وغيرها من المناسبات . ان تكون فردا في عائلتنا ، يعني يوم ميلادك بيكون يوم الخميس - غصب طيب - بيكون يوم الخميس .، حتى لو صادف يوم ثاني ، الاحتفال فيه بيكون يوم الخميس فقط . واليوم عندنا 3 مناسبات .



المناسبة الاولى : القارنقشوه . هو المفروض يصادف يوم 15 على ما اظن . بس 15 ولا 20 . بنحتفل فيه يوم الخميس .

المناسبة الثانية : عيد ميلاد اختي الي اصغر مني بسنة . صديقة طفولتي الي يصادف 11\9 ههه دايما نضحك عليها ونقول لها عيد ميلادك كارثة . وبالفعل هي ماخذه من هالتاريخ نصيب ، دايما في احتفال عيد ميلادها يصير ( اكشن) ، المسكينة تعقدت .
المناسبة الثالثة : عيد ميلاد اخوي الصغير الي اصغر مني ب اممم اظن 15 سنة او اكثر . هذا مايعني اني كبيرة ابدا . هم بس جابوه متأخر .




بالعادة نحضّر لطلبية الكيك من اول الاسبوع عشان نستعد ليوم الخميس وكل شي يكون مرتب ومنظم ، بس هالمرة مافي كيك . ليش هالمرة الأهل مطرحّين ( حلوى ) ! كأنه العيد ، وكل هذا عشان القرنقشوه، لا وحاطين زينة في الحوش . يعني عايشين الجو عالاخر . اكيد لازم شوية لمسات حديثة ، الهدايا مرتبة وحاطينها في اكياس صغيرة . ولأن عادة القرنقشوه شبه انقرضت مافي احد يمر على البيوت ، وبالتالي نحن نخلي اولاد العيلة - ياحليلهم - يمروا من مكان لمكان في الحوش، وكل خاله وعمة جالسه في زاوية وعندها الهديا والحلويات . ونااااااااااااسة . المهم اكمل سالفة الكيكة ، الاهل قالوا مافي كيك تصرفوا وسوا كيكة يالحلوى . قلنا لهم فالكم طيب ماطلبتوا شي . المهم الخبر تسرب للشغالات . ووحده منهم حبت ( تتبّجل ) وسوّت لنا كيكة صدمتنا فيها وخسرنا صحن حلوى كبير هالفاضي ، وقلنا لها (يا بنت سلسيدو ) كلّي الكيكة وحدك . رحنا وسوينا كيكة ثانية . مسكنا صحن الحلوى وقلّبناه على وشه ، وبعدين حطينا عليه( الفرّاخ - البوب كورن - الفوشار ) عشان محد يقول ايش هذا الفراّخ بعد . وبعدين صفينا الشموع . مراحل تحضير الكيكة واضحة امامكم في الصورة .



بدأ العيد ميلاد بعد ماخلص القرنقشوه ، وبدينا في الغناء مرة هابي بيرثداي بالانجليزي ، ومرة سنة حلوة ياجميل بالعربي . هذي سُنّة الاهل يعني مايصير نقول بالعربي بس او بالانجليزي بس لازم الاثنين . ولأن عندنا عيدميلادين ، يعني غنّينا 4 مرات مرتين بالانجليزي ومرتين بالعربي . ولأن الاخت الي عيدميلادها المفروض 11\9 ومايصير يمر اليوم بدون كارثة . من كثر ما غنينا مرة بالانجليزي ومره بالعربي ، احترق الفراّخ ،هههههه وصارت حريقة . وانا اكيد مت ضحك وانا اشوف على وجه اختي ، لأنها كانت تقول عيدميلادي الماضي احترقت فيه علبة كلينكس كانت جنب الكيكة وهالمرة الفراّخ . ههههه مسكينة كسرت خاطري .


كل عام وانتو بخير حبايبي . وقرنقشوه سعيد مقدما . وحركة حلوة من الاهل انهم يحاولوا يحافظوا على هالعادة ويطوروا فيها عشان يحببوها في نفوس اطفال هالزمن الي مايملى عينهم شي :)




معاني المفردات للمارين هنا من غير العمانيين :

القرنقشوه : قرقيعان في الكويت . قرنقعوه في البحرين . حق الليلة في الامارات . ماجينة في العراق.يصادف منتصف رمضان .

فراّخ : كما هو موضح اعلاه ، بوب كورن ، فوشار .

مطرحيّن حلوى : حاجزين ومسوين طلبية حلوى خاصة .



تفاصيل الصور :


التقاط : مسقطية الهوى

الخميس 13 رمضان 1430 هــ