الأربعاء، 8 يوليو، 2009

يافرحة ماتمت


اليوم المغرب دخلت علّي شغالتنا وماسكة هدية وقالت : في واحد جول انتي صديقتي ، جول هذا مشان انتي . مسقطية الهوى - مستغربة- : غريبة من هاذي. ردت مارياكلارا - اسم شغالتنا- : هي مافي جول انا سؤال انتي مين؟ جول انتي في معلوم مال هي . اخذت الهدية وقلت: مشكورة ماريا ماقصرتي. مسكت الهديه والاخت مارياكلارا على راسي . قلت: يالله فارجي ، روحي شغلك. ردت : لا انا في ريد شوف. مسقطيه الهوى تقول في نفسها : صحيح انك لزجة. فتحت الهديه وياسلام : لون جنان وهدية روعه . شهقت ماريا كلارا : وااااااااااجد هلوو فنان. شفت عليها بنص عين : تعرفي فنان بعد، يالله باااي ماريا سي يو. اخذت الهدية ورحت غرفتي : كان في بطاقه فتحتها بريبه وقرأتها / تقول فيها صاحبتها الاتي :


مرحبا مسقطيه الهوى


اسمحيلي على هالهدية المتواضعه اتمنى تعجبك بس لاتفرحي فيها كثير ، انتي الظاهر ماتسمعي الكلام ووحدة عنيدة والظاهر توأم الروح معاها حق لما توصفك : ان عنادك نصك. اظن انا خبرتك ان ترجعي تكتبي مواضيعك وتخلي ملتقانا الي صارلك كم يوم ملوعة كبادنا فيه.

اظنك عرفتيني ايه نعم انا كاملة الاوصاف . من حقك تعتبري الهدية رشوة اواي شي يخطر فبالك ، المهم ترجعي تكتبي مواضيع . وإلا اذا استمر حالك على ملتقانا المرة الجايه برسلك " نعالي" سامعة ولا لأ .

يالله انتظر اقرأ موضوع الليلة .


كاملة الاوصاف .8-7-2009



مسقطيه الهوى مازالت تحت وقع الصدمة . عينها قوية هالكاملة الاوصاف في احد يرسل لأحد مايعرفه هالكلام ، اقرأ كلمة " نعالي" وانصدم اكثر في وحده بهذي الجرأة تقول لمسقطيه الهوى برسلك نعالي المرة الجايه اذا ماكتبت مواضيع.من وين طلعت لي كاملة الاوصاف؟! معقولة توأم الروح مسويتلي مقلب وتريد تعيشني وهم ان هي طيبة. لأنها هالايام تقول انا طيبه وانتي ظالمتني في المدونة وقدام القراء مطلعتني شريره . انا طيبه وانتي ماشفتي الشر الحقيقي ! .

معقولة هي خلقت شي اسمه كاملة الاوصاف عشان توريني ان في شخصية غيرها تفوقها شرا واستبدادا ، وبعدها تتغير نظرتي لها واشعر انها ملاك يمشي على الارض. والله ماعارفه . الوقت يمضي وانا كل ما افتح الكمبيوتر اتردد اكتب واحط وصلة الاصدار الخامس لملتقانا ولا اطنش واسمع كلام كاملة الاوصاف. اففف انا ماخايفه بس محتاره بجد.الي بسويه الاتي : بحط وصلة ملتقانا 5 ومابكتب في العنوان اي شي له علاقه بملتقانا عشان لما تجي كاملة الاوصاف تقرأ تكمل وتنحبط في اخر الحلقه مو من اولها . لأني انا مسقطيه الهوى ماممكن اخلف وعودي وانا عاهدت اني بغير المشهد للأبد وبنشر الاصدار الالكتروني لملتقانا وما بنزل كلمتي الارض .


إلى كاملة الاوصاف :شكرا للهدية الجنان ذوقك يجنن وانا ما بعتبرها رشوة ولا حاجه . انتي تامري امر دامك وحدة من قراء هذي المدونة من حقك تأمري وتنهي ، وعلى راسي والله انتي وتوأم الروح وكل العيون المارة على مدونتي . الله لايحرمني منكم .
هذي وصلة ملتقانا (5)


تفاصيل الصورة:

التقاط : مسقطية الهوى

الاربعاء 9-7-2009