الأحد، 21 نوفمبر، 2010

أوبريت 40 كوكب ومجرة

اموت انا في التأثر
لاتعليق بس لما رسلت الصورة لتوأم الروح قالت : عزيزتي بنت نصيب ،،اغراءات مثلا !!
يختي على الغمازة والابتسامة



alien head


كلام الناس لبيقدم ولا يأخر ،، كلام الناس ملامة وغيرة مش أكتر



انتي ايش تشوفي وإلي وراك ايش يشوف ؟!


عاوزة ايه ؟!




ماما حبيبتي الكاميرا هالصوب


حد يفهمها وين الكاميرا ، ترا انبح صوتي

الي شاغل بالك وفاك حلقك يتهنابه


مصرين يعذبوا قليبي بتأثرهم


زاهية انتيه :)



وجه يشرح الصدر


والله بعدك شباب واحلى من احلى صبية


فكرة حلوة

كل عام وانتم بخير جميعا بمناسبة العيد الاضحى والعيد الوطني 40 .

طبعا انا وطنية جدا لدرجة اني زينت سيارتي ، وكل زملائي مستغربين او بالاحرى ( غيرانين ) لأن زينة سيارتي أرق وأكشخ من ( الاعراس المتحركة ) الي مسوينها في سياراتهم ، ما باقي ملصق ولا بالونه ولا صورة ما حطوها في سياراتهم . صح ما خبرتكم اخوي هو اخذ سيارتي يزينها بعد ما وصيته توصية ما بعدها وصية :

يا بني واخي الصغير .. أياك ثم اياك ان تلصق رقم (40 ) . لأني سوف اقتلك وارشحك بخيزران اربعين رشحة .

يااخي وحبيب قلبي .. انني وإن اقسو عليك فهي محبتي الخالصة ان لا تقع كغيرك في فخاخ اربعين بطيخة واربعين موزة ، الاحتفال بعيد الوطن ليس بالارقام . فأنا ها هنا أوصيك وشغالتنا ( مريام بو عج ) شاهدة على كلامي ، بأن تضع خطوطا بالوان العلم فقط وان تبتعد عن الرقم 40 وتاج شعار الديوان .

هذا وادعوا من الله ان يسدد خطاك ويوفقك في مسعاك .

طبعا اخوي ( مواطن عماني يحب يسوي كوشة وعرس على سيارته ) ولأنه ما عنده سيارة ، تجاهل وصيتي الاخيرة ، وحط على البونيت رقم 40 !!!!!!!!!! ووصلتني الصورة وانا في دبي وتحديدا في السينما اشوف فيم red ، وخرجت من قاعه السينما واتصلت بالاخ الكريم

مسقطية الهوى : قسما بالله ما تنخمد اليوم ولا يقربك نوم ، والرقم 40 بعده على سيارتي . تو تقوم وتفز وتفردلي طولك وتروح تطلع الي سويته في سيارتي . ايش بيقولوا الناس : مسقطية الهوى تقول ما لاتفعل . انا تريدني احوم بسيارة فيها رقم 40 قدام الناس !!!

بقتلك لو ما طلعت الملصق الي فيه رقم 40 ، عندك ساعه بالضبط ، وبعد ساعه توصلني صورة سيارتي بدون ملصق دودة ام اربعه واربعين .

يالله باي .

طبعا اخوي راح وسمع الكلام لأني ( بالفعل عصبت ) وعناده ما يمشي علي .يروح يحط رقم اربعين على ( السيكل ) الي عنده ، اما سيارتي يحلم يسوي فيها هالحركات . وعدى الموضوع على خير . وسيارتي طلعت انيقة وقمر بعد ما حطوا خطوط العلم بشكل مميز وبسيط وحلو . وطبعا زملائي في الدوام بينبطوا لأن زينتي البسيطة احلى من زينتهم الي تعبانين فيها وما مخلين شبر في السيارة بدون ملصق :)


بس يالله الناس ( أذواق ) ، ولأن الناس ( أذواق ) ولأن الناس ( مختلفين ) قرر التلفزيون العماني ينتج اوبريت مدته اكثر من ساعه يشارك فيه (طبعا ) اربعين دود ودودة ، قصدي اربعين فنان وفنانة ( اقمار وشموس ) في أوبريت الشموس . يقولكم الفنانين الي حبوا يشاركوا كانوا اكثر من اربعين ، بس التشريف شمل اربعين فنان وفنانة التزاما بأم اربعة واربعين ، لأنها لو خالفنا العدد اربعين بتزعل علينا ونحن ما نقدر على زعلها .


طبعا ، انا اتابع كل منتج وطني جديد ، وانزل الاغاني الوطينة واسمعها في السيارة ( لوجه الله ) لا انتظر ( بنتلي ) ولا ( شبح) ولا ربع مليون . عشان ما تقولوا مسقطية الهوى باغية ( تتملق) .

نرجع لأغاني العيد الوطني . خصوصا ( الاوبريتات ) . جمع ( أوبريت ): أوبريتات أو أوبريتة أو أبرتوت ، او أوبريتوس ... وحدي ما اعرف سالفة ( الجمع ) دومها معذبتني .

المهم ... أموت وأعرف من يسمي الاوبريتات . خاطري اعرف ، من يسميها ؟

اخاف يكون في عالم الفضاء العماني الوحيد ( إلي حيلتنا ) هو إلي يسميها ؟

ما معقولة كل عيد الابريت اسمه ( اوبريت شموس الخير ) ، او ( أوبريت مواكب النور ) و ( أوبريت سناء الاقمار ) الخ الخ

كل اوبريت نسويه نجوم وكواكب وأقمار ومجرات .

يعني كنوع من التغيير سموه اي شي ثاني ، حتى لو ( أوبريت الاربعين ) انا راضية والله ما بقول شي ، مدام هو بمناسبه العيد الاربعين وفيه اربعين فنان واربعين وأربعين فستان واربعين مصر واربعين دشداشة واربعين صروال . عادي سموه ( اوبريت الاربعين ) وخلصونا .

سميتوه ( شموس الخير ) وشفنا الشموس وشفنا الخير :)

يعني ما افهم بعد 40 سنة محد قادر يطلع بفكرة اخراج جديدة ؟؟؟؟!!؟!!

معقولة كل اوبريت فيه الفنان ووراه كم واحد ممسكينهم الات موسيقيه وليسوا عازفين ، لأن مافي عازف كمان متأثر باللحن راسه بصوب واصابعه في صوب والكمان نفسه في صوب ، لا والقهر ( مغمض عيونه ) من التأثر والاندماج !!! افففف لو انا يخلوني جنبه أقطع حبل اندماجه وتأثره ( بكرخه ) من الكمان على الراس .

كل الاوبريت ناس متأثرين !!! واموت في التأثر انا . قلبي لما اشوف واحد مغمض عيونه يعتصر بالاعجاب .

مو بينكم وبين التأثر انتوه ؟! غيبه تغيبكم وتغيب ذا الفن بو تنتجوه .

شي ثاني غير ( كومبارس العازفين المتأثرين جدا ) جايبين كم شاب وشابه وطفلة ومجلسينهم اونه يمثلوا انهم في مسرح ، وكل واحد ملبسينه وشاح وكمة ارجوز فيها الوان العلم وقمصان حمرا . سويتوا كل هذا ، ما قدرتوا تخبروهم : ترا في كاميرا تصوركم ؟

إلي فاك حلقه ، وإلي يشوف فصوب ويصفق فصوب ثاني ، وإلي مبوز وهو رافع صورة السلطان . وإلي يصفق وهو غضبان وما طايق عمره . !!!!!!!!!!!!!!!

ليش ؟! إلي ما فواده يرجع بيتهم . ما لازم نطلعه في التلفزيون قدام العالم .


وللأمانة اقول ان الاوبريت مال العيد 35 ( مواكب النور ) أحلى وأجمل من هذا الاوبريت الركيك . ما كفاية لامين 40 فنان . وللأمانة اقول ما كلهم سيئين ، صراحة في وجوه تثلج الصدر والواحد يفرح يشوفها وفي وجوه يعني ما لازم نقابل فيها حد .


امنيتي في هذا العيد المجيد :

1- ادخال اسماء جديدة للاوبريتات الغنائية ، والابتعاد قليلا عن علم الفلك والنجوم والكواكب . هناك مجالات اخرى في العلوم تستحق منا الاهتمام والرعاية لنقتبس منها اسامي لأغانينا .

2- تغيير افكار الاخراج ، مالازم كل اوبريت ورا كل فنان ( كومبارس يمثلوا العزف ) وهم ما لهم دخل في الالات ولا في الموسيقى . لأن ، هالفكرة بصراحة محد عرضها في التلفزيون من الستينات ايام ام كلثوم ، وانتو بعدكم ( عالقين ) هناك .

3- الالحان .. ماشفت ولا لحن حماسي . كل الالحان فيها رومنسيه وشوية وبنغني ( ياشادي الالحان واه اطرب واسمعنا يا للي ) و بنقوم نطلع ( المنديل ) ونجلس ننهط ونصيح .

4- طبعا ما كان في امنية رابعة بس انا بكتب امنيه رابعة عشان الرقم ( 4) :) والعيد الاربعين ( محد احسن عن حد ) :) الشرط الرابع انكم توعدوني يخلص العيد وتنسوا رقم 40 ، خلاص لوعتوا كبادي . ما اريد لا اربعين فنان ولا اربعين بطيخة .