الثلاثاء، 8 مايو، 2012

تحريم الضحك او التحشيش ام الاثنين معا

خلاص الحمدلله يدي تعقمت من كل شرور هذي الحياة وغسلتها بماي وصابون ديتول ومبيض .. يوم ان السالفة وصلت لتحريم تداول نكت المحششين والمخمورين . 


ما فاهمه ... يعني الغش حرام ( وفي ناس تغش كل يوم ) 
الكذب حرام  ( وفي ناس تكذب كل يوم ) 
السرقة حرام ( وفي ناس تسرق كل يوم ) 


كل هذا يستاهل  نذكر الناس فيه ليل ونهار ، عشان هالمجتمع ينظف .


بس اننا  نفتي في ( نكتة محشش ) !!!!! 


ماعليه ، يمكن بعد ما الناس تسمع الكلام وما تداول نكت المحشش ، الله يهدي المحشش ويخترع النووي . 


تعرفوا ان في كثير من المصريين ، خايفين من شي اسمه ( الوجه المتجهم الصحراوي ) وهذا التشبيه الذي اطلقوه على السلفيين الذين استبدلوا حتى لهجتهم المصريه وسلوكهم المصري ، وبدأوا يتشبهوا بالوهابيين المتعصبيين ( لا احب التعميم ، يمكن يكون في وهابي غير متعصب ، لهذا وجب التنبيه ) . 
من وجهة نظري ، من حقهم يخافوا على ثقافتهم وخفه دمهم ، الي يمكن تكون سبب رئيسي في استمراريتهم رغم مرارة الواقع .  انك تخلق نكتة من واقع مرير امر ليس بالهين وهي نعمه لن يحرمها الا من لم يعرفها ولم يمتلكها . مثلنا تماما !!!  


كنا نعلم ان المخدرات والتحشيش حرام ومنكر . واليوم حتى انك تضحك على المحشش عيب وحرام !! وبعدين حتى انك تشوف على محشش عيب وحرام ، واحسن تقلع عيونك ، وتعيش بدون حواس !!!! 
والله اريح . مو نبغالهن حواس ، ومشاعر ، واحاسيس ، وضحك وغشمره ، نلبس وجه واحد ، ما يعرف يتفاعل ، الدنيا ترقص فوقه وترفسه وتلطمه وتكفخه وهو وجه صنم !!! ما يحس بشي . 


رسلولي نكت محشش ، قلت لهم لو سمحتوا نكت المحششين حرام ، ومافي داعي تحرجوني ، لأني ما ناوية اضحك بعد اليوم . 


وسؤالي للحلقة القادمه : 
هل الضحك حرام ؟ ام التحشيش حراام ؟ ام الاثنين معا ؟ 


من المتوقع يكون الجواب : 
محد قال الضحك حرام بس لو اختلط بالتحشيش يكون حرام . لان الحشيش حرام .  


انا اشوف ان تحريم نكت المجانين اولى !!! 
لأن المجنون ابتلى بشيء  ، مثل المرض ، من الله ، لايد فيه ولا حيله . واحنا نضحك عليه !! مع انه ممكن مبدع وفنان . واحنا كمجتمع عماني شرير جدا ، لما يضحكوا على حد يقولوا له ( يالهبيلة ،، يالبغام ، يالمجنون ، يالدنجمه ) وكل هذا ابتلاء من الله تعالى . ولما حد ما يشوفنا نقوله : يالعور ، ولما حد ما يسمعنا نقول : يالصم !!

يعني الاولى نطرق لهذي السلوكيات ولا انا غلطانه !!!! 




اما في حاله نكت المحششين والمخمورين 
 المحشش و المخمور، قرر انه يروح سكه الحرام ، وصراحه يستاهل يصير مصخره وينضحك عليه . عشان يكون عبرة ومحد يقرر يصير محشش عشان ما يتهزأ . يعني الضحك عليهم ممكن يكون رادع لواجد ناس :) محد يريد يكون ملطشه للعالم . 




#سؤال_ اهل - الذكر 
#إفتاء 
#حرام_حلال