الأحد، 21 أغسطس، 2011

هلالي وانا حرة فيه































فطرت اليوم في منزل توأم الروح ، واستمعت الى بيان خبر اعلاننا يوم العيد قبل الحشر بعشر ، فنظرت نظرة تأمل طويلة على الشاشة وقلت : والرؤية ؟؟؟؟؟؟؟؟؟؟؟؟؟؟؟!!!!! أبعد ان انبطت مرارتنا وكبادنا وقولوننا العصبي ، تلجأون الى الفلك !!


فقالت توأم الروح : تو انتي مافي شي يرضيك ؟ الرؤية ما عاجبتنك ولا الحين يوم مشينا على الفلك عجبك !!!

فقالت مسقطية الهوى : يرضيك اوديك الشغل فوق حمار ، وارجعك بطيارة ؟!



فقالت توأم الروح : خرفتي مسقطية ؟!



مسقطية الهوى : لا لا ما خرفت . يعني لو مقررين نتبع الفلك من اليوم ورايح ، نبدأها من السنه الجاية ، حبكت هالسنه !! يعني نبدأها بالرؤية ونختمها بالفلك ! صرنا مسخرة بين الناس ! خلي الناس ، يغيبوا ! . انا بيني وبين نفسي استحيت ، وجاني مايشبه الانفصام . هههههههههههههههه ، اهي اهي عااااااااااااا ،ههههههههههه


توأم الروح : مسقطية !!! كيف تضحكي وتبكي في نفس الوقت ؟!



مسقطية الهوى : مو اسوي ! مامن شوية هذا الجنون جاني . حتى الدول الي تتبع الفلك على قولتهم ما يعلنوا قبل 10 ايام متى عيدهم !!!!!! إلا نحن نوم بغينا نقحم في الماي ، عقينا ثيابنا قبل . ليش ياربي ليش ؟!! ايش ذنبي يعني ، تو لما الناس تسألني من دول العالم ، يقولوا ليش اعلنتوا العيد من الحين ، ايش اقولهم ؟!! أقل شي يخبرونا ترا ناويين نعتمد الفلك ونخلي الرؤية ، تو الناس نظرها ضعيف ما مثل اول . يعني محد معبرني ولا حد يقول هذي مسقطية تعرف ناس ، يمكن حد من معارفها يسألها . محد باغي يخبرني مو مستوي في عمان وهلال عمان ! . ايش اقول حال الناس :( اقولهم ما عندي خبر ، توني سمعت منكم ومن الجيران . اهي اهي خانقتني العبرة ، يعني انا ما انسانه !؟ يعني انا هين اروح ؟!


توأم الروح : لا تروحي مكان مسقطية ، جلسي مكانك . يغيبوا بو تعرفيهم عطيهم الاذن الصما ، كل واحد يشوف بلاده ولا يتدخل في شؤون غيره . نحن كيفنا ، ياخي مزاجنا نفطر على الفلك ، وكان مزاجنا نصوم على الرؤية ، كيفنا " هلالنا " ونحن حرين فيه ، نشوفه بعيونا ، نشوفه برجولنا ، نشوفه بصيّمتنا ، نشوفه بكيعانا ، محد له خص .




مسقطية الهوى : ايوا صح محد له خص ، هلالنا كيفنا فيه ، نشوفه مثل ما نريد ، كل واحد بيعيد على حسابه . وبعدين فتحت موقع " تويتر \ twitter " وشفت الناس تضحك علينا ، وكتبت لهم جملة وحيده :



هلااااااالي وانا حرة فيه .