يعني فوق انه يوم السبت ، وفوق انه يوم النكد والغم . أتصبح بخبر : ان المطار بيتأجل سنتين يعني بدل 2012 بتجهز توسعته 2014 والاعمال الاضافية قد تكلف 500 مليون دولار .
من له قلب وفواد يسمع هالكلام من الصبح ؟!!
الخبر محتاج قلب من حديد او من جليد ...
يعني ناويين تبطوا مرارتي مثل حسني .
حسني لما انبطت مرارته قال واحد : أنفقعت مرارته بعد ما فقع مرارة الشعب !!
بس انا ما حسني ، انا مسقطية الغلبانة الي مناها ومنى عينها تشوف تحفة المطار تجهز ، لكن صدق الي كتب في السبلة : شكلنا ما بنلحق على المطار كان كذا الحاله ، احتمال الاجيال القادمة تشوفه !
بمناسبة الحديث عن الاجيال القادمة .
أصلا بيبقالهم شي ؟!!!!!!!!؟؟؟؟؟؟؟؟؟؟؟!!!!!!
( ولا إحنا حتى اللصوصية عندنا لها نصيب من الخصوصية )!
يعني إذا قدر الله جابت مسقطية مسقطيين صغار ، بيحصلوا شي ؟!
بيكون وقتها " الحول حول " خلص والنشح خلص ، يمكن بيحصوا " فراخ " يابس ومديوس .
انا كان قلبي حاسس ، قبل فترة كتبت " كبسة المطار " . ما تنبأت بشي ، الجواب باين من عنوانه .
يعني زمان قلنا ما مشكله ما كان في توسع عمراني كبير وحتى السيب كانت تعتبر بعيدة شوي وخارج مناطق الكثافة السكانية . بس الحين نعمل بإصرار عجيب على توسعة المطار القديم بتكلفة تبني لنا مطارين واكثر لــــــــــيش ؟!!!!!!!! أضف الى الكثافة السكانية والتلوث الصوتي الي قد يسببه وجود مطار سبب توسعته الاساسي ، توقع زيادة الحركة الجوية في السلطنة ( وبذكركم بعد فترة ويمكن بعد ما يجهز المطار ، بيتفطنوا لهالنقطة ويقولوا عشان مصلحة الشعب بنبني مطار بعيد شويه !!!!! وعندها سألطم ) ، اضافة الى ما سبق الارض رخوة ومحد ما تكلم وقال ، بس لأ قلنا بنقويها وبنكبس التراب ، إلي يقول احنا عايشين في جزيرة ومافي حل إلا نبني في هذا المكان ! .
لا ما بس بيتأخر انجاز المطار سنتين بس ، فوق الي راح بنصرف 500 مليون دولار !
الناس بنوا مطاراتهم وخلصوا ، ومثل مطار مسقط الدولي والعكة الي فيه ما شفت ولا سمعت .
راس مالنا مليونين راس ، ويمكن الحين وصلوا 3 ملايين ، ومحسسينا اننا مئة مليون !! نشتغل برا عمان ، وفي عمان اكبر توظيف في وظائف سائق ، ونادل ، وعامل نظافة! . يعني اولادي المسقطيين الصغارلما يشرفوا لهذي الدنيا ايش بيشتغلوا ؟!
حبايبي والله ماتهونوا .
وصلني ايميل من قارئ متابع يقول انه ماعنده شغل الا انه يقرأ " للمتذمرين " أمثالي الي في المدونات والمنتديات .
هل حقا انا " متذمرة " ؟ّّّ!!!!!!!
والوضع عادي وطبيعي ، او على قولتنا " مشي حالك " .
اخي المحترم لا بأس ان تقرأ ل 1% من الي ماعندهم سالفة ومتذمرين من باب كسر رتابة 99% من الشعب الي يقولك " مشي حالك " " متعودين دايما " . أتحمل امثالي لأني بباسطة خايفة تنبط مرارتي وهذي مساحتي للتنفيس.
حد قالي البركة في اولادنا والجيل القادم .
قلت له : هذاك انت متأمل خير تكلم عن نفسك ، انا اولادي غاسلة يدي منهم من الحين . على الأقل جيلنا عنده قطرة دم يحس فيها ، الاجيال الي الحين ما تحس بشي . إلي مسوي نفسه " أيمو " ونابذ نفسه عن المجتمع وإلي شيطان خابطنه . اسكت عني . اولادي انا حاسه بيطلعوا ما مال شي . ماشي يقهرني إلا الآباء الي واااااااجد متأملين في ابناءهم " ماخذين ابو الملقب القوي " . اونه يقولوا : انا ما بقول شي الحين . ولما تسأله يعني ما ناوي تتكلم تقول رايك . يرد عليك : انا البركة فأولادي بيكبروا ويغيروا هالصورة القاتمة !
تو انته من صدقك ؟! اولادك بيغيروا الصورة القاتمة . يعني اولادك بيغيروا القادم . تو انت خسف ؟! اولادك لما يكبروا يكون الوضع تعقد اكثر مما هو متعقد ، وانت حاط رجل على رجل وتقول : اولادي بيغيروا ؟! . يعني انت ناوي تريح وتخلف لأولادك تركة ثقيلة من العقد والكبسات إلي ما ممكن يحلها حتى " هاري بوتر "! .
اولاده بيغيروا العالم ، انشالله كل واحد فيهم يطير فوق " عسقة " !!
ههههههه تذكرت واحد في منتدى مسمي نفسه " عسقة المحبة " !! نوبه زين .
وأخيرا يقول شاعر العرب ..
" شلنا يا بو جناحين لا عند المحب حتى في الشهراللية "
ويا أولادي يا أولادي المسقطيين الي في علم الغيب ، تريدوا الصدق ما خاطري فيكم .
