للأسف لست في عمان ، لأشهد امطار الخير والبركة لهذا العام
لكن الله يخلي البلاك بيري والفيس بوك وتويتر والاذاعة والتلفزيون الي ممكن تتابعهم عن طريق الانترنت .
بس كل هالمصادر سببت لي احولال وانفصام ، للاسباب الاتية
الصور الي تشوفوها فوق ، مأخوذه من البلاك بيري ،طبعا الصور خوفتني على اهلي ومعارفي في عمان ،بس الحمدلله الاذاعة طمنتني ، وكانت هذي بعض المقتطفات :
المذيع : الامور طيبه وكل شي تمام ، مانريد نهول الامور ، خلونا نستمتع بالجو ، اذا في زحمة في الشارع ، انزل من السيارة وكلم الناس وخفف عنهم وعنك ، واحنا هنا بنونسكم في الاذاعة وخلوكم معانا .
متصل : احنا الحين ( عالقين ) في الطريق للسيب ...و ....
المذيع ( مقاطعا ) : اخي العزيز خلونا ما نقول ( عالقين ) وكأن الاوضاع مامريحة ، الامور طيبه واستمتعوا بالاجواء .
المتصل( تحفة زمانه) : احب اهنئ الشعب العماني بمناسبة هالاجواء الطيبه اعادها الله علينا باليمن والبركات . ( هذي الناس العاقلة تتصل تهني بالمطر ما انتوه جالسين تفزعونا من الصبح )
- سبحان الله حسيت بطمئنينه وراحة بال ما طبيعيه ، اتاري الناس تهول الامور ، العمانيين - دومهم مال اشاعات - خوفونا مرة يقولوا :
- طريق العامرات مسكر ( بعيد الشر من متى يتسكر طريق العامرات ، عمره ما تسكر ولا احيده تسكر على حد ، دومه سالك ، وما يخلى )
- ومرة يقولوا وادي عدي والوديان نازلة ( الوديان محلانة من زمان ، وماشي فيها ماي ، عاد تنزل من شوية نفاف نزل الصبح ، اتقوا ربكم )
- ومرة يقولوا مستشفى النهضة غرق ! والحين يطلعوا المرضى وينقلوهم من الغرف ( انا مسكت راسي افففف غرق مستشفى النهضة مرة وحده ، كيه يوم جونو ما غرق هيغرق تو :) بس جالسيين تهولوا الامور وتسويوا هوايل وقبب ، وهي كم حبه مطر خفيفات لطيفات نزلن يبردن عليكم )
الامور طيبه وسمعوا كلام المذيع وروحوا فكروا بمشاكيك العيد والشوّ ا ، بدل سوالف المعصرات : مستشفى غرق ، وحادث فيه 19 سيارة ، السيتي سنتر سقفه يخر ماي ،،، بس جالسين تخوفونا وتشلوّبنا ونحن برا عمان خايفين ، والسبب انتو يلي ما تراعوا ضميركم وتنشروا اشاعات وتخوفونا وتطفروا بروحنا ،،، الحمدلله الاجواء طيبه ومستمعين الناس بالجو ، لا تخربوا عليهم فرحتهم .
عيبوه .. تبغيوا انازعكم مثل الصغيرين الصغار .. اخر مرة اسمع عنكم حد ينقل سويلفات تهول الامور وما تعكس حجمها الطبيعي . ماعندكم شغل ماخليتوا مبنى ما هدمتوه وما كسرتوا سقفه ، راعوا ضمايركم ، زين كذاك انتو تقولوا كلام والاعلام يكذبكم . حتى صديقتي القطرية في البلاك بيري مستغربة تقولي : ليش حاطين صور تخوف ، وفي قناة عمان مافي شي كله اغاني ومسلسلات . قلت لها : معروفين العمانيين يحبوا الاشاعات ويكبروا الامور ، الله يهديهم ، انتيه خذي الخبر الاكيد من الاعلام الرسمي هو الي ينقل الصورة على حقيقتها ، وخليك من السوالف مال البلاك بيري والصور الي يرسلوها لاعبين فيها بالفوتوشوب .
