الثلاثاء، 22 مارس، 2011

عيد الأم وهرب الأم

اصدقائي المتابعين ، اخواني المراقبين :)
أعود إليكم مرة اخرى ، وانا اشعر بشوق جارف للتدوين ، وقد كتبت كثيرا لكن لم اقوى على النشر . خشيت من انفعالي الزائد في خضم هذه الاحداث المتسارعة . خصوصا وكما يبدو انها تسير الى نحو متطرف خصوصا من تلك الفئة التي تود الرجوع الى العصور الظلامية وتعيش مع " فلنستون " - ارجو من مراجعة جوجل للمزيد من المعلومات - وطبعا انا مع حرية التعبير ، لكن يا اخي باغي تعيش في العصر الحجري او العصر البيذامي او العصر الغباري اقول لك بكل مافيني من مشاعر تتقبلك كما انت ولا تفرض عليك شيئا : غيب وعيش في اي جحر تريده !! بس لا تحشرنا كلنا معك !!!!! رايح تضارب الناس في مسرح حصن الفليج كأننا في عمان مجموعة غجر ( لا والله بسلامة الغجر الغجر يحبوا الفن والالوان الزاهية ) اما انت كائن يحب الظلام ويحب الرطوبة تعيش تحت الصخور ، وفجأة تظهر !!! وتقول انا الاغلبيه !!
وكما يبدو فأن الامور بدأت تفقد مسارها السلمي وظهرت الاصوات المتطرفه تسيطر على المشهد . وفي خضم هذه الاحداث يسرني الحديث هنا وبمناسبه " عيد الام " الذي كان بالامس ، بعضا من يوميات امهاتنا انا وصديقتي الغالية توأم الروح ، خصوصا وانا عارفه ان عدد كبير منكم مشتاق لطلتها في المدونة .
أتصلت فيني توأم الروح مساء امس محبطة
مسقطية الهوى : الووو ها سميحة مو خبار كيف اجواء عيد الام معكم ؟
توأم الروح : انطمني وسكتي عني . رحت بيت اهلي اشوف اسلم عليها واعطيها هديتها شفتها لابسه عباتها ورايحة عني ، ولما سألتها : هين سايره اليوم عيد الام ! . قالت بسريه تامة : عمان امي وابوي ، وعمان اهم من عيد الام انا عندي شغل شوية . وطلعت وخلتني !!!
مسقطية الهوى : توأم الروح ترا والله وشلّتيني ( خوفتيني ) على خالتي بنت مرهون ( اسم ام توأم الروح ) ؟ مالها مسكينة !!! هين رايحة بليل ، كلامها ما يطمن كأنها بتسير تستشهد . روحي دّوريها ، ما ناقصين فضايح .
توأم الروح : ترا لحقتها وخرجت اتبعها من الباب ، وجات سياره مرسيدس سودا فيها مخفي وقبل ما تركب فيها شافتني امي جايه وراها ، وصرخت فيني : دخلي داخل بسرعه ما يخصش هين سايرة ، قلت عندي شغل وماعندي كلام ثاني.
مسقطية الهوى : ههههههههههه معقولة توأم الروح تتهزأ . على كثر ما فرحانه فيش بس في نفس الوقت خايفة على بنت مرهون . روحي دوريها وطمنيني عليها يوم بتحصلوها .
توأم الروح : غيبي تو باي باي . بروح اسأل اخواني عنها يمكن خبرت حد وين سايرة . باي
بعد مرور 4 ساعات اتصلت توأم الروح وكانت الساعه تشير الى 11 مساءا .
توأم الروح : الوووو مسقطية
مسقطية الهوى ( شبه نايمة ) : مو هناك خير ؟ امش في اي مركز حصلتوها ؟
توأم الروح : بغيت اطمنش امي توها واصلة بالسلامة ، بخبرش التفاصيل بكرة على الغداء .
مسقطية الهوى : اوكي تمام .
في ذات الليلة اهديت امي مبلغا ماليا . لا تتفاجأوا امي من النوع الصريح يعني عادة تحدد هي هديتها قبل بشهر .ففي عيد الام الماضي قالت لي :
بنت محمد : الغالية حبيبة امها مسقطية . تعالي هنا جلسي جنبي . عاد انا بشتاقش يوم بتتزوجي بعد كم شهر وتسيري عن امش .
مسقطية الهوى : والله بنت محمد بصدق تحبيني ؟
بنت محمد : يالخسف من ما يحب ولده ؟!
مسقطية الهوى : ههه حبسبتش اول ما تحبيني . قلت يمكن كل شي من بنت محمد جايز .
بنت محمد : صرفه تصرفش تضحكيني وانا ما باغيه اضحك التو .
مسقطية الهوى : مووو اذيه الضحكة الي بمواعيد عندش ؟
بنت محمد : المهم لا تطولي السالفة . تو انا جمعتش فيني وجلستش جنبي ، عشان انتيه نبيهه وذكيه وتعرفي ان بعد شهر بتعبري بحبك لأمك . ها تعرفي مو المناسبه الشهر الجاي؟ يالله عاشت الذكيه .
مسقطية الهوى ( تحاول تتذكر ) : اممممم يعني ما اظن عيدميلادش لأننا اتذكر انا وانتي يوم سوينا تقدير السن انا بنفسي في مركز الشرطة عشان تطلعي جواز اول مرة وتروحي العمرة ، انا وحدي مختارة تاريخ كشخة عشان يكون عيد ميلادك . ههههههههه يالله اذكر ذاك اليوم اني غمرت من الضحك . كتبتلك اول شي اونه تقدير عمر 10\10 هههه ويوم جيت احط السنه كتبت 1910 هههههههههههههه مو ديناصور بعيد الشر ؟ ذيك اليوم ورمتي وزعلتي بس انا قلت اني كنت امزح وحطيت عيدميلادك في الجواز 10\10\1940 عشان ما تزعلي صغرتش 10 سنين . ههههه
ملاحظه : ( هذي القصه حقيقة انا اخترت تاريخ ميلاد امي 10\10 تقدير سن لان ما عندها شهادة ميلاد ، لان وقتها انولدت في الطبيعه ما كان في مستشفيات )
بنت محمد ( عصبت وقطعت حبل ذكرياتي ) : تو نحن ما شهر 10 ! نحن شهر 2 وبعد شهر بنكون في 3 . يالبغام ايش اليوم الي يذكرش بالام شهر 3 ؟
مسقطية الهوى : شهر ثلاثة شهر ثلاثة شهر ثلاثة ايش يا مسقطية . شهر ثلاثه اظن فيه يوم الماي العالمي ، وفيه عيد ميلاد صديقتي نوسه ، وفيه ......
بنت محمد ( مقاطعة بغضب ) : بس بس انا اقولش شهر ثلاثه فيه عيد اللوح الي جالسه قدامك . عيد الام الي حملتك 9 شهور في بطنها وياريت ولادة سهله ، ولادتش عسرة مثل عينش . غيبي عني ما باغيه شي منش
مسقطية الهوى ( احساس فظيع بتأنيب الضمير) : ابوس راسك سامحيني ، ونزلت على ركبي ومسكت شعري وفرقته وسويته قرنين مثل ايام الطفولة وجلست اغنيلها واهز راسي : امي امي ما احلاها ... اسعى دوما كيف ارضيها . وحضنتها وقلتها انتي عيدك كل يوم ما شهر 3 .
بنت محمد : هذا الكلام مايمشي معي ، عجب لو عيدي كل يوم ابغى كل يوم هدية ،ايش رايك ؟
مسقطية الهوى : لا الشيمة ارجووش ، عيد الام يوم واحد في السنة ، ماشي غيره . بس اطلبي واتمني يا ست الكل كلي فداء هالعيون .
بنت محمد : خلي عيونش حالش . انا ابغى :
1- مبلغ وقدره 100 ريال .
2- عطر امواج .
3- دهن عود من الزين .
4- قطعة حرير .
وعاد ما بكلف عليش باقي الهدايا نخليهم حال السنة الجاية .
مسقطية : !!!!!!!!!!!
احسنتي بنت محمد واجد تراعيني انتيه . ما تبغي ساعة رولكس ؟! بعد .
بنت محمد : ترا والله اغضب عليش .
مسقطية الهوى : لا لا تغضبي اعرف حافظه الكلام " الجنة تحت رجولش " ما قلنا شي بجيب كل شي وفوقهم باقة ورد ، وعنا ما حوشنا شي من هالمعاش .
ركزوا معاي هذي قصه عيد الام السنة الماضيه ، اما هالسنة فأمي ضاعفت المبلغ وقالت انها ماتريد هدايا تريد :كاش !
زين ما قالت تريد شيك . ربكم لطف وسلم .
المهم رحت امس سحبت المبلغ ورحت عند امي ،وبعد بوسات الهرم الثلاثية : بوسه الراس ، بوسه عالخدين . واضافت امي بوسه رابعة بهذي المناسبه ورفعت كفها وقالت : بوسي . ايوا كذاك كوني بنت عاقلة ورزينة . هين الفلوس ؟
مسقطية الهوى : تفضلي دول الي حيلتي .
بنت محمد : مووه ؟؟؟؟؟؟؟؟؟؟؟! ما سمعت عيدي مره .
مسقطية الهوى : لا ماشي اقول تصرفيهم في الهنا والخير .
هذي قصتي مع عيد الام هالسنه اما توأم الروح المسكينه فلم تحتفل بعيد الام هالسنه ، لان امها تركت العائلة وراحت وقالت بكل سرية : عندي شغل شوية . وجات سيارة غريبه مرت عليها واختفت في الظلام .....
جات توأم اليوم ظهر اليوم في المطعم الي عزمتني فيه وخبرتني القصه :
توأم الروح : كيف كانت عيد الام عندكم ؟
مسقطية الهوى : مختصر جدا 4 بوسات وسلمت المبلغ المطلوب . ودعاء بأن يحفظ لي الله امي الحبيبة .
توأم الروح : حتى امي امس ما بغت هديه ولا سوت عيد ام ، راحت تقول دعاء مع الحريم .
مسقطية الهوى : دعاء ايش ؟ عيد الام احيده حرام عندهم المطاوعه .
توأم الروح : لا لا دعاء للبلد .
مسقطية الهوى : تصدقي حتى امي اشوفها خايفه على البلد . من الي صاير ؟
توأم الروح : بس امي غير كانت مع الاعتصامات السلمية ههههه بس لما رجعت امس رجعت كأنها ماهي .
مسقطية الهوى : ههههههههههههه عطوها جرعة .
توأم الروح : جايه محشايه حشي ، وتعمم وهي كانت ما تحب التعميم .
مسقطية الهوى : زين ما راحت امي ، لأنها تموت في شي اسمه تعميم . كله عنها شغب ومخربين ما تتفاهم . ععهههه
توأم الروح : هيه ولله لو راحت بنت محمد كانت مصيبه اظن بتسير صحار بعصاها .
مسقطية الهوى : ههههه صح والله بس البركة في بنت مرهون ، اشوفها بتقود الحملة .
توأم الروح : جايه تصرخ والله هذيلا ما محصلين الادب كان زين اربيهم بالخيزران خربوا البلاد ، وعطلوا مصالح العباد ، باغين حقهم ويشلوا حقوق الناس . وهذا الدمار بو يسموه " النت " يكتبوا فيه ويشتموا فيه الناس . انا لو يعطوني القرار كان امنعه من عمان .
مسقطية الهوى : وابوي شاحت بنت مرهون . بنت مرهون باغيه تمنع النت عنّا . زين الله راد البحور عن ولد ادم يجور .
توأم الروح : ههههههه امي جايه وزايد خوفها على عمان ، ورعبتني معها .
مسقطية الهوى : بيني وبينك كلنا على اعتاب مرحلة مجهولة وجديدة . ولازم نقدم مصلحة الوطن والشعب على مصالحنا الفئوية .
ويارب احفظ عمان وقائد عمان وشعبها الوفي .