الاثنين، 26 نوفمبر، 2012

في العزا


كوني بعيدة عن عمان تقوم صديقتي العزيزة كركية بين الحين والآخر بنقل بعض أحداث حياتها لي كنوع من السلوان يفرح قلبي البعيد عن عمان . بالأمس صحيت من النوم بسببها

كركية : مسقطية قومي بسش رقاد .. قومي بغيت أخبرك سالفة

مسقطية : موه هناك ؟! باغيه أرقد

كركية : اقولش سمعيني قبل خلاف رقدي

مسقطية : قولي

كركية : خواتي راحن عزا جارتنا امس

مسقطية : الله يرحمها ..

كركية : جايات فاطسات من الضحك

مسقطية : خواتش كماش ! لا حول والقوة إلا بالله الناس في عزا مو يضحكبهن خير ؟

كركية : أوين عجوز جالسه آخر المجلس و تسأل عجوز غيرها جالسه اول المجلس

العجوز ١ ( من آخر المجلس) : حميييده اووووه حميييده

العجوز ٢( من اول المجلس ) : يوووه يو الغاليه

العجوز ١ : أسألش ميمونة بنت الحارث مو تجيله خالد بن الوليد ؟

العجوز ٢ : من ميمونه ؟

العجوز ١ : الصحابية شيه .. الصحابية الجليلة


مسقطية :هههههههههههههه مو ذكرهن بميمونة بنت الحارث ، كأنهن باغيات يشامجنها

كركية : تعرفيهن العجايز أي حد يتكلمن عنه كأنه جارهم في الحارة حتى ميمونة بنت الحارث وخالد بن الوليد ما سلموا . بس ما عرفنا ليش باغيات يعرفهن القرابة بينهم .

مسقطية : خسارة عندي نص قصة بس بعدني بكتبها في المدونة

كركية : وأنا ما أروم أقول شئ إلا تكتبيه

مسقطية : مو أسوي انتي عيني ورجولي في عمان

كركية : الله يعودش بالسلامة وتكتبي سوالفش وحدش

مسقطية : هههه انشالله بس بعدني ما استغنى عن مغامراتش



- Posted using BlogPress from my iPad