لم اقرأ جريدة الشبيبة رغم اني احب تصميمها وشكلها الجديد اكثر من " الوطن " وطبعا اكثر من " عمان".
ذهبت للقاء " توأم الروح" ، رأيتها واقفة يداها خلف ظهرها كمن يخبئ شيئا .
مسقطية الهوى - ذبحها الفضول -: ايش ايش ورا ظهرك اشووف ؟؟
توأم الروح - تحاول الهرب - : لا لا ما بعطيك ، انا معاي شي تموتي فيه .
مسقطية الهوى - بترجي - : ارجوووووك خليني اشوف
توأم الروح : انزلي على ركبتك وقولي يا توأم الروح الله يخليك عطيني الشي الي ورا ظهرك .
مسقطية الهوى - تجثو على ركبتيها - : توأم الروح الله يخليك عطيني الشي الي ورا ظهرك .
توأم الروح قامت بإخراج جريدة من خلف ظهرها ، ترفعها وتفتح على صفحة معينه ، وترميها لي .
توأم الروح : اقرأي . اظن هالصفحة تهمك .
مسقطية بشغف تقرأ :
الخبر (1) : 40 فستان ............
الخبر(2) : 440 للمقام السامي ....
الخبر (3) او الخبر التحفة : صحيفة من جلد الغنم الخالص طولها 40 مترا . وتوقيع اهالي العامرات على صحيفة العهد .
حينها فقدت الوعي ،وبدأت بدق راسي في " الصبّية" ، وتوأم الروح جابت الماي البارد وبدأت برشه على وجهي ، وشرعت بوضع كفيها على جبيني وقراءة المعوذات .
ما عارفه ايش اقول ، بس اود ان اوجه كلمة بسيطة :
الى اهالي العامرات صانعين صحيفة من الجلد الغنم الخالص بطول 40 متر : بني قريضة وقوم قينقاع مثلا ،،
صحيفة ايش ؟! بنقوم الحين نجلس نكتب صحف على ضلوع الغنم والرقع والجلود ، ونعيش مع " فلنستون " اذا ما تعرفوه هذي صورته فوق
طحتوا من عيني يا اهالي العامرات ، معقولة اخرتها صحيفة من المصخ الخالص طولها 40 متر . مو جاكم ؟ من دمركم بهذي الفكرة .
وصحيفة العهد ، وين عايشين ؟!
وانشالله وين وقعتوا الصحيفة لا تقولوا خلوني اخمن . عندي احساس في دار " ابي الارقم " .
خلاص تو عرفنا اذا بنسوي مسلسل تاريخي محد غيركم بيفيدنا وينفعنا .
الله وأكبر بعد اربعين سنه اشتقتوا لجلد الغنم الخالص !!! خلاص تعدمت الافكار عليكم ، ما بقى إلا " البعر " الخاص ، وتكمل عندنا ابتكارات دودة ام اربعة واربعين .
ايش بقى ؟! ماذا تبقى ؟! مو تبقى ؟!
صرفه تصرفكم ، بأي لغة اكلمكم . اه صح بما انكم تموتوا في الزمن القديم وأيام الجلود والبعارين
مالذي تبقى يا بني وادي العامرات ، هل بقي شي من الجلد نصنع منه ثوبا للشيخ ؟
اهل العامرات : كلا يا مسقطية الهوى لم يتبقى من الجلد شيء ، فلقد جمعنا كل جلود الشياه والبقر والثيران التي ذبحت في يوم العيد وصنعنا منها صحيفة العهد والولاء بطول 40 متر .
مسقطية الهوى : ولماذا لم تجمعوا مصارين الشياه ومعاليقها لنصنع منها " مصروب " بطول 40 متر؟!
اهل العامرات : يالله يالله مسقطية افكارش تنشرى بالذهب .
مسقطية الهوى : لا والله انتو الي افكاركم تنشرى بالمصارين والبعارين
خوزوا عني ،،،
بعق بحصى خلااااااص
ده كتييييير أوي كتيييييير
