لأني ما أقرأ جرايد في الويكند ، اتصبح على ملغان الفواد يوم السبت
النكد الأول :
مبنى سفارتنا في كوريا إلي بيفتتح 2011
والمّكون من 5 أدوار !!
امم اظن سفارتنا في مصر ما وصلت 3 أدوار وكانت ب 9 ملايين وشويه ، يعني هذي السفارة كم بتكلف ؟!
نحنا نريد نكحل عينا بمبنى 5 أدوار في عمان .
ما اعرف ليش في نص قراءتي للخبر بديت افكر بأسلوب سياسي ، وقلت اكيد لكل دولة وزنها وحجمها يعني معقولة نبني في كوريا سفارة من دورين ابدا لايمكن . طيب لو بنينا سفارة بأمريكا !!! كيف حجمها بيكون وكم طولها ؟ اكيد بتكون اول ناطحة سحاب عمانية هي ( السفارة العمانية في امريكا ) .
الخبر الثاني (حين لاح لي جهلي ) :
تعرفوا كيف يكون الاحساس لما تقول شي ، ويطلع غلط وتتفشل . انا تفشلت اليوم ، سلم علي احد الزملاء في الدوام وكان مريض من فترة ، فقلت له : حمدلله على السلامة ، انشالله احسن الحين ؟!
فرد علي : الحمدلله احسن .طلع عندي صفار وسويت حجامه في ابن فريس ( تعمدت احرف الاسم عشان ما نسويله دعاية ) :)
فقلت له : ليش ما خليت حد ( يشرطك ) ؟
اشوف الرجال مات من الضحك وراح الصفار وأحمرت خدودة ودمعت عيونه . وبعد ما زالت نوبة الضحك قال لي : شايفتيني نخلة ( يشرطوني ) ؟! هذا الي تقصديه يسموه ( شطب ) .
اكيد انا وجهي نزلت منه ( خطوط ماروكو ) وغطت وجهي من الفشلة . وحلفت اني بفّرق بين ( الشطب والشرط ) .
في سالفة اخرى اكثر اهميه ، بس ما قادرة انزل الصور لأني في الدوام ، ارجع البيت واشوفكم على خير .
