أيش تريدوا أكثر ؟!

ماخليت شي ماسويته ...

قلت ما بجلس بغرفتي ولو سجادها أحمر ،، رحت وجلست في ركن بلاطه ابيض واسود ( الوان كرة القدم الكلاسيكية ) ، وعلى البلاط زولية حمراء ..

قلت لازم امخمخ وأكيف واكون راعية مزاج ،بعد الجول والطرد ، قلت يامسقطية كيفي واطلبي شاي داكن بحليب خفيف ..

وبعد كل هذا .......... ما استحيوا وخسرتوا وفريق استراليا طول المباراة يلعب ولاعب مطرود !!.. ناويين تجلطوني!

للجمهور العماني الوفي ( اعذاركم بطت كبدي)

أمثلة للأعذار العمانية الاصيلة :

1- تراهم طوال ونحن قصار ..

2- ترى الجول الثاني كان ( اوف سايد ) ... \ والهدف الأول ايش كان اوف سايد بعد ؟! ماكأنكم سجلتوا الهدف بالحظ ، حتى ضربة جزاء كنا بنضيعها لولا الله ستر علينا ولطف وسلم ..

3- تراهم يركضوا بسرعة .. ماكأنكم السلاحف.؟ !

للجمهور القليل الي حضر المباراة ، رحمّوا نفسكم ما كأنكم كم حبة في الملعب بعدكم ترموا مفرقات نارية في الملعب ( عيب ) .

هاردلك ..

بس بعدنا نشجعكم ايش نسوي دايما ترفعوا ضغطنا بس مالنا بّد منكم.. والظفر ما يطلع من اللحم ..

يالله اخليكم ،، وراي مباراتين .. مصر والجزائر \ وانجلترا والبرازيل .. والى اللعب الجميل بعيد عن التوتر الاعصاب ورفع الضغط ..الحين وقت المزاج والتكييف ..

تفاصيل الصور :

التقاط : مسقطية الهوى

14-11-2009