مقر الشركة الوطنية للعبارات 
التذاكر
مخطط العبارة
شوية تعليمات " يعني لاسمح الله صار شي"
الدرجة السياحية
درجة رجال الاعمال : كراسنا اريح واكبر :)
انا قبطان العبارة : ربنا ستر وما غرقت التايتنك " اسفه الصورة مظلمة شوي"
صورة مع طاقم القيادة الرؤوس المخفية صورتي لأني ما اريد اخوف احد فيكم، وصورة الرئيس التنفيذي للشركة اخافه يزعل
منظر من العبارة 
منظر الغروب من العبارة يجنن
منظر آخر
من على متن العبارة ساعه الغروب
منظر آخر
نظارتي " الارماني " والتذكرة معززة مكرمة في درجة البزنس ،عاد ما فشرة:)
يد توأم الروح تشرع بخنق اللبن ، ضحية المسكين
قناة عمان ورانا ورانا
يخت ال سعيد ومركب خشبي /حداثه واصالة
الميناء
منظر من العبارة قبل بدأ الرحلة
علم وطني الغالي
اكيد يا حلوين تذكروا اني في يوم من الايام تكلمت عن شركة العبارات وقلت انها فاشلة وان لو العبارة أمتلت عن بكرة ابيها ونسبة الاشغال فيها 100 % ماتجيب للشركة تكلفة ديزل الرحلة . وهذا ما كلامي هذا كلام احد المهندسين فيها . وهذا المهندس كان زميلي في الشغل قمة في الذوق ، والدليل انه عزم زملائه السابقين في رحلة على العبارة ومن ضمن الزملاء السابقين ( مسقطية الهوى ) . اكيد انا قلت لازم اروح فالحة انتقد الشركة وانا في مكاني روحي عايني الموقع بنفسك وشوفي بنفسك . التجمع في الشركة كان الساعه 4 ونص . اكيد انا ما اقدر اخطي شبر واحد بدون ( توأم الروح) ، لأنها لما عرفت بالدعوة الخاصه قالت :
والله مارحتي الا اذا رحت معك ، انشالله صار شي في العبارة وانتي ياحليلك مامال شي ، يتغرقي وبيجيك دوار البحر وبتلعوزينا .
زميلي اتصل بنفس يتأكد من الي بيحضروا ( رحلة الغروب) : ها مسقطية نترجاك اليوم .
مسقطية الهوى : ايوا بس ممكن صديقتي تجي معاي .
المهندس : افااا بدون ما تستأذني اي حد من طرفك على العين والراس . بس عطيني اسمها .
مسقطية الهوى : توأم الروح بنت صافع بن كافخ الشديدي .
المهندس : والنعم والله . نلتقي 4 ونص عند بوابة الشركة .
مسقطية الهوى : تسلم ماقصرت ، نشوفك .
خبرت توأم الروح وقالت: انا بمر عليك بنروح بسيارتي اضمن انا اسوق ، خصوصا بالرجعة انتي بتكوني دايخة ما تتحملي البحر ، انا بمر عليك من البيت الساعه 4 .
مسقطية الهوى : من قالك ما اتحمل انا ماعندي دوار البحر مافيني شي .
توأم الروح : قولي هالكلام لغيري يالزبدة .
الساعه 3 ونص اتصلت توأم الروح : مسقطية اطلعي انا برا ؟
مسقطية الهوى : خيييير انشالله ، ايش جاينبك من الحين ، انا بعدني ما لبست ولا كشخت .
توأم الروح : هذا المطلوب ، طلعي الحين يالله ولا بروح واقول انك اعتذرتي واروح وحدي والله اسويها ، قولي ما اقدر.
مسقطية الهوى : والله تقدري .
لبست عالسريع وعبايتي ما مكوية وحالتي حالة ، ابدا ما وجه اقابل فيه الناس .وكله من توأم الروح . الساعه 4 الا ربع نحن قدام شركة العبارات .
مسقطيه الهوى : زين كذا ، واصلين قبل العشر بحشر .
توأم الروح : ههه ايش بينك وبين الامثال روحي لعبي ، اسمها قبل الحشر بعشر . صح انك ينطبق عليك المثل الي يقول : " ماجالها تبخرت ويوم تبخرت احترقت "
مسقطية الهوى : مشيني في مسقط لحد ما يقرب موعدنا ، عندنا نص ساعه .
توأم الروح : اول مرة تقولي اقتراح في محله .
تمشينا في مسقط ، وكانت توأم الروح تسألني هذي البنايه الجديدة الي عند القصر مال مجلس عمان الجديد ؟؟
مسقطية الهوى : لأ هالبنايه مكاتب للماليه والثانيه الي على يسارك مكاتب للديوان ، المبنى الي تتكلمي عنه بيكون بالقرب من فندق البستان في الجهة الي فيها محافظة مسقط من جهة الشرق .
توأم الروح : انتي ايش مركبة في هالراس GPS
مسقطية الهوى ( بوزت ) : خلاص ما بتكلم ولا بجاوب على اي سؤال .
توأم الروح : غيبي .
وصلنا للشركة 4 ونص ، وبعدها انتظرنا شوي تجمع بقية المعازيم . الي ركبوا الحافلات . بس احنا كان عندنا تصريح ودخلنا بالسيارة للميناء. كنا انا وتوأم الروح اول من ركب على العبارة . وما قصروا الجماعه عطونا جولة كافيه ووافيه . وبعدها قالوا اختاروا اي مكان تجلسوا فيه من اول العباره لآخرها تحت امركم . انا وتوأم الروح تضاربنا . هي تريد تجلس في السياحية وانا اقول لأ بجلس في درجة رجال الاعمال ، السياحية لاحقين عليها ، لأننا لما نجي هالعباره بفلوسنا بتشبعي من الجلسه في السياحية . خلينا نركب ( البزنس كلاس) .
بعد ما شبع كتفي قرص وكفخ وافقت توأم الروح انها تجلس في درجة رجال الاعمال . انا عيني كانت تدور شي أكثر تميزا.
وسألت زميلي : ماعندكم درجة اولى ؟
رد : ايوا عندنا تعالي شوفيها .
رحنا وشفنا الدرجة الاولى من الزجاج الباب مسكر .
مسقطية الهوى : اريد اجلس هنا وانشالله ادفع 100 ريال .
رد زميلي : للأسف ممنوع ، هذي ما ممكن حتى تحجزي فيها .
مسقطية الهوى : !!! كيف ؟ وليش مسوينها من اساسه ؟ الناس بتدفع من جيبها ، فلوسها وهي حرة فيها.
رد زميلي : هذي ما تفتح الا للوزير او الوكيل .
مسقطية الهوى : انتو ناقصين ، وحدكم خسرانين ، وهذي غرفة ( كبار الشخصيات ) فيها 8 كراسي ، وعازلينهم بباب وحدهم ، ومحد بيستخدمها الا الوزير وإذا شرف بعد ، وإذا شرف كل شي بلاش .
عصبت وقلت :
انا بروح اجلس مكاني في رجال الاعمال احسن من لاشي ء .
المناظر قبل الغروب كانت فظيعه ، شواطينا وكل شي في بلادنا حلو ربي يحفظ هالبلد . اكيد كلنا ننتظر اذان المغرب بفارغ الصبر ، واحنا مرتزين اول الكراسي في درجة رجال الاعمال والتلفزيون قدامنا مباشرة ، اكيد حاطين قناة عمان ، اذن الاذان . وسمعنا دعوة للأفطار من البوفيه. رحنا واكلنا خفايف . اكيد اغلب العمانيين ما يفوتوا العيوش . الوجبة المفضلة :) انا بعد احب العيش لكن احترازا من دوار البحر الي توأم الروح صارعتني فيه قررت اتجنب العيش واكتفي بالخفايف . اكيد انا صورت لكم كل شي . بس للأسف ما لحقت اصور العبارة من برا . للحين زعلانه على هالموضوع .
اخذنا فطورنا ورحنا نجلس مكاننا ، نسمع الناس تتحرطم واحنا مافاهمين ايش السالفة . ههه طلعت الناس معصبة لأن ماغيروا قناة عمان ، الي حاطين فيها عيدوسعيد ، وجالسين يطالبوا يشوفوا " شمبيه في شعبيه الكرتون " . قلت في نفسي : الناس شكلها كلها متأذيه من التلفزيون العماني . المهم محد عبرهم ولا عبرنا ، وشفنا قناة عمان كمن يتجرع الحنظل المخلوط بعصير التانج مع الروب .عمري ما شربته بس اظن انه يلوع .
جلست اصور كل شي وأسلي نفسي . تحركت العبارة وانا كنت مستانسه ورحت وجيت ، وبعدين وقفت حسيت اني ناسيه شي . تذكرت توأم الروح . رجعت لكراسينا ،وشفت توأم الروح مغطية على وجها و( غايصة ) في الكرسي .
مسقطية الهوى : توأم الروح خير ايش فيك لونك مخطوف .
توأم الروح : مافيني شي حاسه بدوخة وصداع .
مسقطية الهوى : اكيد هذا ما دوار البحر ، لأن انا الزبدة على قولة بعض الناس بس الي عندي دوار البحر .
توأم الروح : سكتي عني احسنلك .
مسقطية الهوى : اوكيك .. تروحي معاي عالسطح ( وين ما توقف الهوليكبتر ) ؟
توأم الروح : صحيح انك ما سهله عن الطيحي ، رحمي نفسك .
مسقطية الهوى : اعرف ما اريد وعندما ذهبت الي اللهب ذهبت لأحترق .
توأم الروح : احترقي بكيفك .
صعدت على سطح السفينة ، المنظر كان يجنن خصوصا القمر الي كان مكتمل . وانا طالعه شفت ( كابينة القيادة ) . قلت على مين لازم اسوي حركة ، واقود هالعبارة .
مسقطية الهوى - وهي تشاور على الكابتن - :" hii ,, captain do u mind if i take a picture with u "
الكابتن : " ya sure "
بغيت اخذ صورة معاه، بس كل الطاقم جاء يصور . قلت ما عليه احسن صورة جماعيه .
بعدها الكابتن قال : " you can set in my chair and if u like "
مسقطية الهوى فرحت وتشججت ، ريحني بدل ما اطلب اجلس مكانه ويحرجني ، الحمدلله بنفسه عازمني .
شكرتهم ونزلت مكاني ، ماحصلت توأم الروح .بعد 10 دقائق رجعت .
مسقطية الهوى : وين رحتي ؟
توأم الروح : رحت ارجع احس اني احسن الحين ، انتي دميرة ولا حد يسمع كلامك . ايش جابني معك .والقهر ماصار فيك شي يالزبدة .
مسقطية الهوى: محد بيحسدني غيرك . خمسة وخميسه .
توأم الروح : وياريت تنحسدي ، شكله جدك ( الشيخ محمد ) مامقصر بالحروز .
مسقطية الهوى : عن الغلط كله ولا جدي .
بعد ما تناقرنا لين ما شبعنا ، كانت السفينه وصلت الميناء،. وأول ماركبنا السيارة ، شدت توأم الروح شعري ولوحّت براسي يمين وشمال ، وانا اصرخ من الألم - وقالت : " والله وانا حلفتي عن عشر ، اذا كتبتي اي شي عني في المدونة بذبحك سامعه "
مسقطية الهوى : " ااااي انزين انزين ما بكتب شي ، بقول اني رحت وحدي ومحد معاي ، خلي شعري والله يعور "
توأم الروح : " ولو ان الواحد ما ياخذ منك كلمة ، انتي تسوي الي براسك حتى لوذبحتك وقطعتك .. غيبي روحي بيتكم ما اريد اشوفك شهر كامل "
مسقطية الهوى : " قابليني اذا تقدري يا الترفه يا ام دوار البحر "
توأم الروح عصبت والشرر طلع من عينها ، بس انا كنت فاتحة الباب وهربت وما قدرت تمسكني .
مرت جنبي بالسيارة وقالت : سنورة بعشرة ارواح ، بس بعدني بضربك خليني اشوفك بس .
في الختام :
العبارات خسرانة خسرانة ، وهم يبرروا هالشي ان فكرة العبارات ليست فكرة تجارية وانما سياحية . اذا تحبوا تغيروا جو روحوا مخفضين التذاكر في رمضان 5 ريالات .
الفرد الواحد ( في رمضان ) : 15 ريال
الفرد الواحد ( بقية الاشهر ) : 20 ريال .
الرحلة تسمى ب ( رحلة الغروب ) : من 5 ونص الى 8 ونص .
تفاصيل الصور :
من رحلة رحلة الغروب على ظهر العبارة " هرمز "
إلتقاط : مسقطية الهوى بالتعاون مع توأم الروح .
من كم يوم :)
