لمتى يعني ؟!
اعرف ما ترتاحوا لحد ما مسقطية الهوى تجيها الجلطه بسبتكم .
بتسووها فلم مكسيكي 40 الف حلقة ؟ ولا ايش وضعكم بالضبط .
اوووه متعبين نفسكم مسويين كيكة شكل اربعين ! وياريت انكم (بالفعل )الكيكة الي مسويينها شكل اربعين . قاسين على الخلق وتضحكوا عليهم وجايبين طاولات وصافينهم على شكل 40 وحطيتوا صواني الكيك فوقه !!!!
الابداع ما مر هالصوب ابدا . اسهل الحلول الجاهزة .
- يالله بسرعه جهزولنا كيكة شكل اربعين ، العيد قرب .
- كيف نسويها هالكيكة ؟ لازم نصنع قالب على شكل 40 وبعدين اي فرن بيتحمل عالقالب . لازم نجزء كل قطعه ونطبخها وحدها .
- ليش معقدين المسأله ؟! جيبوا كم طاولة وصفوهن شكل 40 ، وكل ( شيف) فيكم يطبخ كيكة . ولازم يكون العدد 40 شيف .
وفي النهاية الشيفة شيفة والمعاني ضعيفة .
طبعا مسلسل السخافة . بدأناه بأكبر ( كبسة ) ، وبعدين اطول رسالة ، وبعدين اطول حصير ، وطبعا انا ما متفيقة احط لكم كل يوم حلقة من هالمسلسل .
راحين متخنجرين ومرتزين يقطعوا الكيكة ... من فوادهم !!!
ايش احساسك وانت تقطع الكيكة ؟
فخور جدا بما انجزه الشباب العماني في مجال طبخ الكيك ، والمميز ان تدشين هالكيكة جاء تزامنا مع احتفالات السلطنة بالعيد الوطني الاربعين . وهذي هدية بسيطة من 40 طاهي حبوا يقدموا لهالبلد هدية بهالمناسبه المجيدة . وكل عام وانتو بالف كيكة . عفوا اقصد كل عام وانتو بألف خير .
طبعا المجال كان مفتوح لاربعين طاهي ، اي طاهي جاء وكان رقم 41 : مستحيل يشارك . لازم اربعين بس .
عندي احساس ان في ناس فيها قفير من ( دودة اربعه واربعين ) وما عارفه ( تنطب ) مكان واحد . ويبغالا رض بخيزران محناية .
اه لو يوكلوني هالمهمه ؟!
امنيه حياتي لو تتحقق
اكسر اربعين عصا على ظهر كل من يبدع بهذه الافكار الاربعينيه الغير خلاقه والغير مبدعه .
ما عارفين تسووا شي يسوا ويستاهل .. ( هجعوا ) مكانكم ، والله مسامحين ما نبغى شي من كيك ولا من قبولي ولا برياني . بدل ما كل يوم مصورين صوره جماعيه : مرة مع اربعين بطيخة ، ومرة مع اربعين زولية ، ومرة مع اربعين صينية ، واربعين طاولة ....
افففففففففففففففففففففففففففففففففففففففففففففففففففففففففففففففففففففففففففففففففففففففففففف
( هالاففف السابقة فيها اربعين حرف فاء . بليز صوروا مسقطية الهوى جنب الافففف الي بأربعين فاء . بليييييز . )
