مسقط عامرة بالأقنعة: أبريل 2012

الأربعاء، 25 أبريل 2012

كركية وابله حكيمة

اخترت هذا اللون للكتابه ، لأنه لون شاي ( الكرك ) ، لون صديقتي المفضل وشرابها الاوحد .

اعتذر منكم لأني لم اعرفكم عليها من قبل ، اسمها ( كركية) . انا من اطلقت عليها هذا الاسم ، لحبها للكرك . احيانا اسميها ( سليكه ) وهذا اسم اخر وراءه حكاية اخرى ايضا تتعلق بالكرك .

عمان الصغيره عرفتني عليها ، لايغركم حجم عمان الكبير في الخارطه ، يكاد العمانيون كلهم يعرفون بعضهم من شمال عمان الى جنوبها . عمان كلها حجرة وليوان ( على قولة عادل امام العماني ) .

بينما انا وكركيه نتعرف على بعضنا ، اكتشفنا ان اغلب قريباتي كانوا معلماتها ايام المدرسة . هههههه وعاد قريبات مسقطية الهوى ايش يكونوا ؟؟ شريرات طبعا هههههههه عذبوها عذاب مسكينة ،، خصوصا ( ابله حكيمة ) كانت تضربها ضرب في حصة الرياضيات .

كنت احاول اخفف من عقدة ( كركية ) و اقولها ابله حكيمه كبرت وتغيرت ، وانتي كبرتي ، والي كبر ينسى ، لا تخلي هالعقدة تكبر معك . بس للأسف طلعت انا ما عارفه حجم المشكلة !!

كركية : يا مسقطية ،، انتي ما فاهمه ، حكيمتكم شريرة ، والله ماشفت معلمه كذاك ، تصدقي كانت تضرب الصف كامل عشان وحده غلطانه في حل مسألة ، وبعد ما تخلص تضحك وتقول : يالله نعيد الشريط من اول . وتقوم تضربنا بالمسطرة مرة ثانية ، كل يوم ارجع البيت يديني وارمات من الضرب .

مسقطية ( دموعها دموع من الضحك ) والله احاول اضامن بس ما قادره .

كركية : ايوه هذا الي فالحة فيه تضحكي على جراح الاخرين .

مسقطية : لا يا كركية ما قصدي بس انتي الحين بنت ناجحه واكيد ويوم كنتي طالبة كنتي مجتهده .

كركية : ايوا كنت طالبه مجتهدة ، وكل المعلمات يحترموني إلا ( ابله حكيمه ) الوحيدة الي خلتني مصخرة قدام الي يسوا والي ما يسوى .

مسقطية :كركية الله يهديش اكيد انتيه مسويه شي . معقوله تتبلى عليش .

كركية : اخبرش انا موه سويت . في يوم من الايام قررت اكتب لأبله حكيمه رسالة ، اشرح فيها معاناتنا مع الضرب ، وانها لازم تحببنا فيها وتستخدم اسلوب التشجيع ما اسلوب الترهيب ، وان الطالبات يحبوها بس لو تغير اسلوبها شوية . وجلست اسبوع اكتب الرساله واعيد وامسح واكتب ، واشتريت ورقه ( بو ريحه ) عشان اكتب عليه

مسقطية ( مقاطعه ) : لااااااا مستحيل ههههههههههههههه ورق بو ريحه ما غيره ، ليش يا كركيه ليش ، قريباتنا اعرفهم ، يموتوا في الطنازة والتعليقات .

كركيه : خلتني مصخرة للي يسوى والي ما يسوى ، كل المعلمات عرفوا السالفة ، وكل ما امر من قدامها تقولي : ماشي رسايل يالسيلانية .

مسقطية : بموت بموت ههههههههههههههههههههههههههههههه كركيه السيلانية

كركية : والله مسقطية لليوم كل ما اشوف رسالة قلبي يعورني ، عقدتني ، انتي حيانش كلهم كذاك ، وبعدني كنت احاول اتفهم ظروفها ، وكنت كاتبة في الرسالة : انا متفهمين وضعش في البيت ، بس حاولي تفصلي البيت عن شغلش .

مسقطية : ههههههههه وقامت حكيمة وعطتش شغلش وصرتي مشغول دكتورة فوز فاشل . ياخي كركية كان بيكون لش مستقبل باهر في الاصلاح الاجتماعي بس ابله حكيمه دمرت كل مواهبش . موهبه الكتابه : صرتي فيها سيلانية ومال رسايل . موهبه الاصلاح الاجتماعي والنصايح وخلي مشاكلش في البيت بعيد عن الصف ، قامت تضربش اكثر عن اول ، بل بالعكس يوم حد يغلط تقوم تضرب كركية ، صرتي كبش فداء . والمصيبة بعد كل ضربة تقولش : مشاكلي مافي البيت يالنبيهه انتيه مشاكلي فيكن يالخسفات .
بس

ياكركية انا بثبتلك انتي غير عن ابله حكيمه . انا غير صدقيني يالسيلانيه ههههه لا امزح امزح والله بالغلط حبيبتي كركيه خليني ارجع عمان وبشبعك شاي كرك ، كل يوم دلة لعيونك .

الاثنين، 16 أبريل 2012

الأحد، 1 أبريل 2012

شر البلية ما يبكي الارض

ما اعرف ايش اقول ؟!
جالسين تغايروا ساعة الارض مثلا !! ولا فاهمين الموضوع غلط !! ورحتوا مولعين الاوبرا عشان ساعة الارض تنجلط ، وما تغلط مرة ثانيه وتقول للعمانيين تضامنوا معي !!!
بالفعل شر البلية ما يضحك
يصرف بليسكم ، ماذا بينكم وبين ساعة الارض خلوها تغيب ، من متى مقطعين عن كم تضامنوا مع البيئة !
ويوم تضامنتوا تضامنتوا بسواد الوجه .. ماعليه انشالله السنة الجايه تفهموا الموضوع صح وتسكروا ليتاتكم .

- Posted using BlogPress from my iPhone